«كەگەن – نارىنقول» اۆتوجولىنىڭ 20-شاقىرىمىنداعى جولدىڭ بٸر بٶلٸگٸ وپىرىلدى, دەپ حابارلايدى Dalanews.kz.
رەسپۋبليكالىق ماڭىزى بار «كەگەن – نارىنقول» تاس جولىنىڭ 20-شاقىرىمىندا ەرٸگەن قار سۋىنىڭ كٷرت كٶبەيۋٸنە بايلانىستى تٶتەنشە جاعداي بولدى. جول قىزمەتٸنٸڭ ماماندارى جوسپارلى پاترۋلدەۋ كەزٸندە اتالعان ۋچاسكەدەگٸ سۋ دەڭگەيٸنٸڭ شەكتەن تىس ارتقانىن دەر كەزٸندە انىقتاپ, قاۋٸپتٸڭ الدىن الدى.
قارقىندى ەرٸگەن قار سۋىنىڭ قىسىمى سالدارىنان 1960–1970 جىلدارى سالىنعان سۋ ٶتكٸزگٸش قۇبىردىڭ 4–5 بۋىنى بۇزىلعان. نەتيجەسٸندە قۇبىر اۋزى بٸتەلٸپ, جولدىڭ جەر تٶسەمٸ بٷكٸل ەنٸ بويىنشا شايىلدى. وپىرىلعان ايماقتىڭ ەنٸ شامامەن 12 مەتردٸ, تەرەڭدٸگٸ 10 مەتردٸ قۇرايدى. 150 م² اسفالت جامىلعىسى بٷلٸنگەن.
ايتا كەتۋ كەرەك, بۇل ۋچاسكە سوڭعى 50 جىل ٸشٸندە «سۋ باسۋ قاۋپٸ بار ايماقتار» تٸزٸمٸنە كٸرمەگەن. ەرٸگەن سۋدىڭ مۇنداي جويقىن كٶلەمٸ بۇرىن-سوڭدى تٸركەلمەگەن. قازٸرگٸ ۋاقىتتا سۋ جول جيەگٸمەن اعىپ, قاباندى ٶزەنٸنە, ودان ەرٸ كەگەن ٶزەنٸنە قۇيىلۋدا.
جول قوزعالىسى جەدەل تٷردە توقتاتىلىپ, قاۋٸپسٸز اينالما جول ۇيىمداستىرىلدى.
جول-كٶلٸك وقيعالارىنا جول بەرٸلگەن جوق, زارداپ شەككەندەر مەن ماتەريالدىق شىعىن جوق.
وقيعا ورنىنا ارنايى تەحنيكا جۇمىلدىرىلىپ, جاقىن ارادا قيىرشىق تاس تٶسەلگەن ۋاقىتشا جول سالىنادى.
اتالعان ۋچاسكە قازٸرگٸ ۋاقىتتا ورتاشا جٶندەۋ جٷرگٸزۋ ٷشٸن مەردٸگەر ۇيىمنىڭ يەلٸگٸندە. سۋدىڭ اعىسى باسىلعان بويدا قۇبىر مەن جول جامىلعىسىن تولىق قالپىنا كەلتٸرۋ جۇمىستارى باستالادى. جوبا اياسىندا جولدىڭ تابيعي ەسەرلەرگە تٶزٸمدٸلٸگٸن ارتتىرۋ شارالارى قاراستىرىلعان.
وقيعا ورنىندا كەگەن جەنە رايىمبەك اۋدانى ەكٸمٸ, ەكٸم ورىنباسارلارى, پوليتسييا باسشىلارى, تجم قىزمەتكەرلەرٸ, قازسەلدەنقورعاۋ ماماندارى جٷر.
جاعداي تولىقتاي باقىلاۋدا.
