Elordadaǵy Prezident ortalyǵynda 22-26 sáýir kúnderi «Astana Eurasian Book Fair-2026» IX Halyqaralyq kitap kórme-jármeńkesi ótedi. Bul – Ortalyq Aziiadaǵy eń aýqymdy mádeni-aǵartýshylyq sharalardyń biri, dep habarlaidy Dalanews.kz.
«Astana Eurasian Book Fair-2026» kitap kórme-jármeńkesin Qazaqstan Respýblikasynyń Mádeniet jáne aqparat ministrligi jáne Astana qalasy ákimdiginiń qoldaýymen «Foliant» baspasy uiymdastyryp otyr.
«Astana Eurasian Book Fair-2026» kórmesine 80-ge jýyq kitap shyǵarý, tanymdyq-ǵylymi bilim berý jáne poligrafiialyq kompaniia qatysady. Sonyń teń jartysy qazaqstandyq uiymdar bolsa, Qazaqstan, Resei, Túrkiia, Qyrǵyzstan, Ózbekstan, Ázerbaijan, Mońǵoliia, Ispaniia, Qytai, Iran, Belarýs, Portýgaliia, Venesýela, Ulybritaniia elderinen 40 kompaniia qatysqaly otyr.
«Astana Eurasian Book Fair – 2026» kitap kórme-jármeńkesi bes kúndik mádeni-iskerlik baǵdarlamadan turady. Kórme aiasynda jańa kitaptardyń tusaýkeserleri, avtorlarmen kezdesý, avtograf-sessiialar, balalar alańynda arnaiy sheberlik saǵattary ótkiziledi.
Atap aitqanda, Túrkiia Mádeniet jáne týrizm ministrliginiń qoldaýymen jaryq kórgen «Túrik ashanasy» kitabynyń, Bekarys Shoibekovtiń «Aitystyń altyn aidar Bekarysy» aitystar jinaǵynyń, Marjan Ershýdiń «Jalǵyz qol» poemasynyń, «Zamandastar» seriiasymen shyqqan «Eldos Smetov. Tózim. Senim. Jeńis» kitabynyń, Erlan Qojabaevtyń «Qazaq oiýlary» fotoalbomynyń, Anjei Sapkovskiidiń «Mystanger» fantastikalyq shyǵarmasynyń, Ularbek Dáleidiń «Batý han» tarihi romanynyń, Álisher Rahattyń «Iesiz kóleńke», ispan jazýshysy Haver Moronyń «Úmit sapary», Ernest Hemingýeidiń «Qońyraý kimdi joqtaidy», Ázerbaijan aqyny Rásmiia Sabirdiń «Óleń-áiel», Baiyt Qabanulynyń «Mońǵol-óleń» kitabynyń, Nursultan Myqtybaidyń «Aq Jaiyqtyń kóz jasy», sondai-aq «Túrkistan – máńgilik ári árdaiym jańa» jáne «Dimash Qudaibergen. Sheksiz mýzyka» atty kitap-albomdarynyń tanystyrylymy ótedi dep josparlanyp otyr.
23 sáýirde Ulttyq kitap kúni merekesine orai Qazaqstan Respýblikasynyń Mádeniet jáne aqparat ministrligi uiymdastyrǵan respýblikalyq «Ulttyq kitap» baiqaýynyń nátijesi boiynsha jeńimpaz baspalardy marapattaý rásimine arnalǵan saltanatty shara ótedi.
Kórmeniń saltanatty ashylý rásimi 22 sáýir kúni saǵat 11:00-de ótedi. Oǵan memleket jáne qoǵam qairatkerleri, tanymal qalamgerler men sheteldik elshiler qatysady.
