ەلورداداعى پرەزيدەنت ورتالىعىندا 22-26 ءساۋىر كۇندەرى «Astana Eurasian Book Fair-2026» IX حالىقارالىق كىتاپ كورمە-جارمەڭكەسى وتەدى. بۇل – ورتالىق ازياداعى ەڭ اۋقىمدى مادەني-اعارتۋشىلىق شارالاردىڭ ءبىرى، دەپ حابارلايدى Dalanews.kz.
«Astana Eurasian Book Fair-2026» كىتاپ كورمە-جارمەڭكەسىن قازاقستان رەسپۋبليكاسىنىڭ مادەنيەت جانە اقپارات مينيسترلىگى جانە استانا قالاسى اكىمدىگىنىڭ قولداۋىمەن «فوليانت» باسپاسى ۇيىمداستىرىپ وتىر.
«Astana Eurasian Book Fair-2026» كورمەسىنە 80-گە جۋىق كىتاپ شىعارۋ، تانىمدىق-عىلىمي ءبىلىم بەرۋ جانە پوليگرافيالىق كومپانيا قاتىسادى. سونىڭ تەڭ جارتىسى قازاقستاندىق ۇيىمدار بولسا، قازاقستان، رەسەي، تۇركيا، قىرعىزستان، وزبەكستان، ازەربايجان، موڭعوليا، يسپانيا، جۇڭگو، يران، بەلارۋس، پورتۋگاليا، ۆەنەسۋەلا، ۇلىبريتانيا ەلدەرىنەن 40 كومپانيا قاتىسقالى وتىر.
«Astana Eurasian Book Fair – 2026» كىتاپ كورمە-جارمەڭكەسى بەس كۇندىك مادەني-ىسكەرلىك باعدارلامادان تۇرادى. كورمە اياسىندا جاڭا كىتاپتاردىڭ تۇساۋكەسەرلەرى، اۆتورلارمەن كەزدەسۋ، اۆتوگراف-سەسسيالار، بالالار الاڭىندا ارنايى شەبەرلىك ساعاتتارى وتكىزىلەدى.
اتاپ ايتقاندا، تۇركيا مادەنيەت جانە تۋريزم مينيسترلىگىنىڭ قولداۋىمەن جارىق كورگەن «تۇرىك اسحاناسى» كىتابىنىڭ، بەكارىس شويبەكوۆتىڭ «ايتىستىڭ التىن ايدار بەكارىسى» ايتىستار جيناعىنىڭ، مارجان ەرشۋدىڭ «جالعىز قول» پوەماسىنىڭ، «زامانداستار» سەرياسىمەن شىققان «ەلدوس سمەتوۆ. ءتوزىم. سەنىم. جەڭىس» كىتابىنىڭ، ەرلان قوجابايەۆتىڭ «قازاق ويۋلارى» فوتوالبومىنىڭ، انجەي ساپكوۆسكييدىڭ «مىستانگەر» فانتاستيكالىق شىعارماسىنىڭ، ۇلاربەك دالەيدىڭ «باتۋ حان» تاريحي رومانىنىڭ، الىشەر راحاتتىڭ «يەسىز كولەڭكە»، يسپان جازۋشىسى حاۆەر مورونىڭ «ءۇمىت ساپارى»، ەرنەست حەمينگۋەيدىڭ «قوڭىراۋ كىمدى جوقتايدى»، ازەربايجان اقىنى ءراسميا ءسابيردىڭ «ولەڭ-ايەل»، بايىت قابان ۇلىنىڭ «موڭعول-ولەڭ» كىتابىنىڭ، نۇرسۇلتان مىقتىبايدىڭ «اق جايىقتىڭ كوز جاسى»، سونداي-اق «تۇركىستان – ماڭگىلىك ءارى ءاردايىم جاڭا» جانە «ديماش قۇدايبەرگەن. شەكسىز مۋزىكا» اتتى كىتاپ-البومدارىنىڭ تانىستىرىلىمى وتەدى دەپ جوسپارلانىپ وتىر.
23 ساۋىردە ۇلتتىق كىتاپ كۇنى مەرەكەسىنە وراي قازاقستان رەسپۋبليكاسىنىڭ مادەنيەت جانە اقپارات مينيسترلىگى ۇيىمداستىرعان رەسپۋبليكالىق «ۇلتتىق كىتاپ» بايقاۋىنىڭ ناتيجەسى بويىنشا جەڭىمپاز باسپالاردى ماراپاتتاۋ راسىمىنە ارنالعان سالتاناتتى شارا وتەدى.
كورمەنىڭ سالتاناتتى اشىلۋ ءراسىمى 22 ءساۋىر كۇنى ساعات 11:00-دە وتەدى. وعان مەملەكەت جانە قوعام قايراتكەرلەرى، تانىمال قالامگەرلەر مەن شەتەلدىك ەلشىلەر قاتىسادى.
