Qazaqstanda áleýeti boiynsha Qashaǵan ken ornyna teń keletin iri karbonat massivi anyqtaldy. Bul týraly «QazMunaiGaz» ulttyq kompaniiasy basqarma tóraǵasynyń orynbasary Qurmanǵazy Esqaziev Astanada ótken geologiialyq forým barysynda málim etti, dep habarlaidy Dalanews.kz Kazinform-ǵa silteme jasap.
Qurmanǵazy Esqazievtiń aitýynsha, Qaraton, Qajyǵali jáne Jylyoi aýmaqtaryn qamtityn jańa karbonat massiviniń qurylymy Qashaǵan ken ornyna uqsas.
«Anyqtalǵan karbonat massiviniń resýrstyq áleýeti 4,7 mlrd tonna kómirsýtekti quraidy. Bul kórsetkish Qashaǵannyń geologiialyq áleýetimen shamalas. Alaida Qashaǵan teńizdiń taiaz bóliginde ornalasqandyqtan, ony igerý úshin úlken kólemde kapitaldyq shyǵyn qajet. Al bul massiv qurlyqta ornalasqan, sondyqtan shyǵyn kólemi aitarlyqtai tómen bolady», - dedi ol.
Jalpy alǵanda, Jylyoi karbonat massiviniń jiyntyq resýrstyq áleýeti 20 mlrd tonna shartty otynǵa baǵalanyp otyr.
Qaraton ýchaskesinde qazirdiń ózinde tereńdigi 5750 metr bolatyn uńǵyma burǵylanyp, nátijesinde oń qorytyndy alynǵan. Bes perspektivaly nysan aiqyndalǵan.
Kompaniia ókiliniń sózinshe, Qaratondaǵy tabysty nátijeden keiin Qajyǵali ýchaskesinde geologiialyq barlaý jumystaryn keńeitý josparlanyp otyr. Qazirgi ýaqytta jer qoinaýyn paidalaný kelisimshartyn alý boiynsha kelissózder júrgizilýde.
