قازاقستاندا الەۋەتى بويىنشا قاشاعان كەن ورنىنا تەڭ كەلەتىن ءىرى كاربونات ءماسسيۆى انىقتالدى. بۇل تۋرالى «قازمۇنايگاز» ۇلتتىق كومپانياسى باسقارما ءتوراعاسىنىڭ ورىنباسارى قۇرمانعازى ەسقازييەۆ استانادا وتكەن گەولوگيالىق فورۋم بارىسىندا ءمالىم ەتتى، دەپ حابارلايدى Dalanews.kz Kazinform-عا سىلتەمە جاساپ. 

قۇرمانعازى ەسقازييەۆتىڭ ايتۋىنشا، قاراتون، قاجىعالي جانە جىلىوي اۋماقتارىن قامتيتىن جاڭا كاربونات ءماسسيۆىنىڭ قۇرىلىمى قاشاعان كەن ورنىنا ۇقساس.

«انىقتالعان كاربونات ءماسسيۆىنىڭ رەسۋرستىق الەۋەتى 4،7 ملرد توننا كومىرسۋتەكتى قۇرايدى. بۇل كورسەتكىش قاشاعاننىڭ گەولوگيالىق الەۋەتىمەن شامالاس. الايدا قاشاعان تەڭىزدىڭ تاياز بولىگىندە ورنالاسقاندىقتان، ونى يگەرۋ ءۇشىن ۇلكەن كولەمدە كاپيتالدىق شىعىن قاجەت. ال بۇل ماسسيۆ قۇرلىقتا ورنالاسقان، سوندىقتان شىعىن كولەمى ايتارلىقتاي تومەن بولادى»، - دەدى ول.

جالپى العاندا، جىلىوي كاربونات ءماسسيۆىنىڭ جيىنتىق رەسۋرستىق الەۋەتى 20 ملرد توننا شارتتى وتىنعا باعالانىپ وتىر.

قاراتون ۋچاسكەسىندە ءقازىردىڭ وزىندە تەرەڭدىگى 5750 مەتر بولاتىن ۇڭعىما بۇرعىلانىپ، ناتيجەسىندە وڭ قورىتىندى الىنعان. بەس پەرسپەكتيۆالى نىسان ايقىندالعان.

كومپانيا وكىلىنىڭ سوزىنشە، قاراتونداعى تابىستى ناتيجەدەن كەيىن قاجىعالي ۋچاسكەسىندە گەولوگيالىق بارلاۋ جۇمىستارىن كەڭەيتۋ جوسپارلانىپ وتىر. قازىرگى ۋاقىتتا جەر قويناۋىن پايدالانۋ كەلىسىمشارتىن الۋ بويىنشا كەلىسسوزدەر جۇرگىزىلۋدە.