Prezident Pavlodar halqymen kezdesýde óńirlerde aralaýǵa bekingende strategiialyq mańyzdy mindetterdi aiqyndap alǵanyn alǵa tartty.
– Pavlodar – Qazaqstannyń damýynda úlesi mol, mańyzy joǵary aimaq. Ózderińiz bilesizder, ótken aptadan beri óńirlerge saparym bastaldy. Aimaqtardaǵy halyqpen kezdesip, el damýyna qatysty bastamalarym týraly aittym. Aldymen Túrkistan men Shymkentke, sodan keiin Semeige bardym.
Biz aldaǵy qysqa daiyndyq barysymen tanysyp, shuǵyl máselelerdi qaradyq. Oblystar úshin strategiialyq mańyzy bar mindetterdi aiqyndadyq. Bir sózben aitqanda, bul óte maǵynaly saparlar bolyp jatyr, – dep oiyn Memleket basshysy oiyn ortaǵa saldy. Budan keiin Qasym-Jomart Kemeluly qolǵa alynǵan saiasi reformalar jaiyndaǵy oimen bólisti.
– Shyn máninde, halyqtyń qoldaýy – reformalardy tabysty júzege asyrýdyń eń basty kepili. Men tyń ózgeristerge tilektes bolyp jatqan azamattardyń bárine taǵy da alǵys aitqym keledi. Biz bir el bolyp jumyla bilsek, kózdegen maqsatqa jetemiz.
Búgin, mine, ózderińizben júzdesý úshin Ertis boiyna at basyn burdym. Bul óńirge meniń yqylasym erekshe ekenin bilesizder. Pavlodar oblysy – elimizdiń eń kórikti mekenderiniń biri, – dedi. Halyqpen júzdesýde Memleket basshysy el ómirindegi Pavlodar oblysynyń oryny jaiyndaǵy oiyn bylaisha sabaqtady.
– Abylaidyń aqylshysy Buhar jyraý, ǵulama oishyl Máshhúr Júsip, Alash ardaqtysy Júsipbek Aimaýytov osynda dúniege kelgen. Jaiaý Musa, Estai aqyn, Sultanmahmut Toraiǵyrov, Sháken Aimanov syndy rýhaniiat salasynyń aitýly ókilderi osy óńirden shyqqan. Qanysh Sátbaev, Álkei Marǵulan, Ermuhan Bekmahanov, Kemel Aqyshev, Shapyq Shókin siiaqty áigili ǵalymdar – Ertis boiynyń perzentteri. Bir sózben aitsaq, Baianaýyl baýraiy – tektilerdiń berekeli besigi.
Pavlodar oblysynda «Qýatty óńirler – qýatty el» qaǵidaty aiqyn kórinis tapqan. Bul aimaqty ekonomikamyzdyń energetikalyq júregi deýge bolady. Elimizdegi elektr qýatynyń 40 paiyzdan astamy osynda óndiriledi. Qazaqstanda shyǵarylatyn kómirdiń de jartysynan astamy Pavlodardyń enshisinde. Oblystyń árbir besinshi turǵyny óńdeý ónerkásibinde nemese otyn-energetika kesheninde jumys isteidi.
Prezident Pavlodarǵa jasaǵan saparynda oblystyń tranzittik múmkindigin shektep otyrǵan máselege de basa nazar aýdardy. Bul eski kópirdiń jyly. Ertis ózinindegi eski kópir kólik-logistikasyn shektep otyrǵany belgili. Prezident apatty jaǵdaida turǵan kópirdiń retteýdi Úkimetke tapsyrdy.
– Pavlodardyń orasan zor tranzittik áleýeti bar. Biraq, Ertisten ótetin eski kópir kólik-logistika salasyn damytýǵa múmkindik bermei otyr. Onyń apatty jaǵdaida turǵanyna biraz jyl boldy. Kópir arqyly júk kólikteriniń júrýine tyiym salynǵan. Buǵan deiin oblys ortalyǵyn ainalyp ótýge jol ashatyn jańa kópir salý josparlanǵan. Úkimetke kelesi jyly osy jobany bastaýdy tapsyramyn. Joldy kútip ustaýǵa basa nazar aýdarý qajet, – dedi Memleket basshysy.
Sonymen qatar Prezident Ertis ózeniniń sýyn turǵyndardyń tiimdi paidalaný máselesine de nazar aýdardy.
– Pavlodar óńiri úshin Ertistiń orasan zor mańyzy bar. Bul ózen – osy ólkeniń turǵyndary, kásiporyndary jáne aýyl sharýashylyǵy úshin negizgi tirshilik kózi. Sońǵy úsh jylda oblysta sýarmaly jerdiń kólemi 1,5 ese artty. Aldaǵy ýaqytta ony taǵy 2 esege, iaǵni, 300 myń gektarǵa deiin ulǵaitý qajet. Oblys ákimdigi osy máselege basa nazar aýdarýǵa tiis. Úkimetke óńirdiń sýarmaly alqaptaryna bólinetin qarjyny kóbeitýdi tapsyramyn. Bul azyq-túlik qaýipsizdigi turǵysynan ǵana emes, halyqty jumyspen qamtý úshin de óte mańyzdy. Sýdyń tapshylyǵy ekonomikany damytýǵa kedergi keltiredi. Sondyqtan, Ertistiń sýyn tiimdi, únemdi paidalanýǵa airyqsha mán berilýi kerek, – dep kópshilikti sý kózin tiimdi paidalanýǵa shaqyrdy.
