Jıynǵa Astana, Almaty, Shymkent qalalary men oblystar máslıhattarynyń hatshylary qatysty. Jıyndy «Qazaqstan máslıhattary depýtattarynyń birlestigi» respýblıkalyq qoǵamdyq birlestiginiń tóraǵasy Tóleýbek Tóleýuly Muqashev júrgizip otyrdy.
Jıynda jýyrda elimizde ótetin mańyzdy oqıǵa – Qazaqstan Respýblıkasy Prezıdenttigine «Qazaqstan máslıhattary depýtattarynyń birlestigi» Respýblıkalyq qoǵamdyq birlestiginiń atynan usynylatyn kandıdatty aıqyndaý, Jalpyhalyqtyq referendýmnan keıingi Qazaqstannyń jańa saıası arnaǵa túsýiniń tarıhı sátinde júzege asyrylǵaly otyrǵan ózgeristerdi talqylaý jáne pikir almasý, usynys bildirý syndy máseleler qaraldy.
Ózderińizge belgili, Qazaqstan Respýblıkasynyń Prezıdenttigine kandıdattardy saıası partıalar men respýblıkalyq qoǵamdyq birlestikter usyna alady. Osy oraıda, «Qazaqstan máslıhattary depýtattarynyń birlestigi» respýblıkalyq qoǵamdyq birlestigi tóraǵasynyń orynbasary - Túrkistan oblystyq máslıhatynyń hatshysy Qaırat Rahymuly Balabıev respýblıkalyq qoǵamdyq birlestiktiń atynan Qazaqstan Respýblıkasy Prezıdenttigine kandıdat retinde Qasym-Jomart Kemeluly Toqaevty usyndy. Ol óz sózinde:
– Prezıdentimiz Qasym-Jomart Kemeluly Toqaev asa salmaqty saıasatker, bıik parasattyń ıesi, tereń bilimdi dıplomat, kemel basshy, tek elimizge ǵana emes, búkil álemge belgili iri tulǵa, saıasat sahnasynda shyńdalǵan, Táýelsizdigimizdi nyǵaıtýǵa orasan zor úles qosqan memleket qaıratkeri.
Búginde Prezıdentimiz asa kúrdeli geosaıası jaǵdaıda jańa Qazaqstannyń negizin qalap, onyń kóshin bastap keledi. Shyndyǵynda, Ádiletti Qazaqstan qurý jolynda elimizde aýqymdy reformalar qolǵa alynyp, saıası mádenıettiń qalyptasa bastaýy barshamyzdy qýantady.
Sondyqtan, Qasym-Jomart Kemeluly Toqaevtyń kandıdatýrasyn qoldaımyz jáne Qazaqstanymyzdyń kóshin bastaýǵa laıyqty tulǵa dep bilemiz. Onyń qazaqstandyqtardy sara joldan adastyrmaı, bıikterge bastaı beretinine bek senimdimin, – dedi.
Óz kezeginde, jıynǵa qatysýshylar Qasym-Jomart Kemeluly Toqaevty Qazaqstan Respýblıkasy Prezıdenttigine kandıdat retinde qyzý qoldap, biraýyzdan usyndy.
