Elordada balalarǵa arnalǵan vaýcherlik qarjylandyrý júiesin ádil ári ashyq júrgizýge baǵyttalǵan QOSYMSHA.KZ jańa tsifrlyq platformasyn engizý boiynsha pilottyq joba iske qosyldy. Jobanyń jumysy týraly Óńirlik Kommýnikatsiialar qyzmetinde ótken brifingte Astana qalasy bilim basqarmasynyń basshysy Qasymhan Senǵazyev aityp berdi,- dep habarlaidy Dalanews.kz
2021 jyldan beri Qazaqstanda qosymsha bilim berýge arnalǵan vaýcherlik qarjylandyrý júiesi júzege asyrylyp keledi. Prezidenttiń tapsyrmasyna sáikes, bul bastama balalarǵa sabaqtan tys ýaqytta bilim alýǵa teń múmkindik berý maqsatynda engizilgen. Qaǵida qarapaiym: memleket ár balaǵa bir úiirmege qatysýyna qarjy bóledi, al ata-ana balasynyń qyzyǵýshylyǵy men kestesine sai baǵytty ózi tańdaidy.
2025 jyly Astanada 25 000-nan astam bala osy baǵdarlama arqyly tegin qosymsha bilimmen qamtylǵan. El boiynsha – 500 000-nan astam bala qamtylǵan. Alaida burynǵy júieni iske asyrý kezinde ata-analar tarapynan oryndy alańdaýshylyq týdyrǵan birqatar kemshilikter anyqtaldy.
Úsh túrli kezek: bilim, sport jáne mádeniet basqarmalarynyń jeke kezekteri boldy – bul júiesizdik pen teńsizdikke ákeldi.
«Tirkelgeni ótedi» qaǵidasy: áleýmettik osal toptaǵy balalardyń ótinimderi keiinge ysyrylyp, vaýcherler birinshi tirkelgenderge berildi. Júieler biriktirilmegen: kei balalar eki vaýcher alyp, basqalary múlde tys qaldy.
Astana ákimdigi atalǵan olqylyqtardy joiý úshin E-ORDA infraqurylymyna negizdelgen QOSYMSHA.KZ memlekettik tsifrlyq júiesin engizdi. Júie qorǵalǵan derekter ortalyǵynda ornalasqan jáne úshinshi tulǵalardan tolyq oqshaýlanǵan.
Endi ótinim berý, vaýcher bólý jáne qatysýdy baqylaý bir tereze qaǵidatymen júzege asady – ashyq jáne ádil túrde.
Eń basty jańalyq – áleýmettik jikteý engizildi. Ótinimder endi berilgen ýaqytyna emes, balanyń áleýmettik mártebesine qarai suryptalady. 12 sanat bekitilgen, árqaisyna bólek koeffitsient belgilengen:
• Erekshe bilimdi qajet etetin balalar – koeffitsient 5;
• AÁK alatyn otbasylardaǵy, múgedektigi bar ata-anasy bar, jetim balalar – koeffitsient 3-4;
• Kópbalaly otbasyndaǵy balalar – koeffitsient 2;
• 4-18 jas aralyǵyndaǵy basqa balalar – koeffitsient 1.
Osylaisha, kópbalaly nemese áleýmettik jaǵdaiy tómen otbasyndaǵy bala ótinimdi keiinirek bergen kúnniń ózinde, ol jalpy tizimde ózgelermen salystyrǵanda joǵary orynǵa kóteriledi. Bul «kim birinshi batyrmany bassa – soǵan beriledi» degen jarysty boldyrmai, shynaiy teń qoljetimdilikti qamtamasyz etedi.
Endi vaýcher naqty bir úiirmege emes, tikelei balaǵa beriledi. Bul ata-analar vaýcher alǵan soń ózderi balasyna jasyna, qyzyǵýshylyǵyna jáne kestesine sai úiirmeni erkin tańdai alady degendi bildiredi. Mundai tásil júieni anaǵurlym ikemdi etip, otbasylardyń múddesine beiimdeidi.
Tegin qosymsha bilim berý quqyǵyn paidalaný úshin QOSYMSHA.KZ saityna tirkelip, ata-ana men balanyń JSN-in kórsetý, derekterdiń durystyǵyn rastaý qajet.
Memlekettik qarjylandyrýdy jalǵastyrý úshin ai saiyn Jeke kabinetke kirip, balanyń úiirmege qatysýyn rastaý mańyzdy.
Eger bala qazirdiń ózinde qandai da bir úiirmege baryp júrse, sol uiymǵa baryp, onyń derekterin júiege engizýdi suraý qajet.
Ótinimdi tek Astana qalasynda tirkelgen (turaqty nemese ýaqytsha) otbasylar ǵana bere alady.
