1990 jyldarda ózi basqarǵan partiiany qaita jańǵyrtatynyn aitqan Oljas Súleimenov Qazaqstan prezidenti Qasym-Jomart Toqaevtyń saiasi reformalaryn qoldaitynyn málimdedi.
Bastamashyl top ishindegi parlament senatynyń burynǵy depýtaty Omarhan Óksikbaevtyń sózinshe, "tirkelmegen partiia qazirdiń ózinde "erteli-kesh kinálini izdep, synai bermei alǵa basatyn, memleketti nyǵaitatyn baǵdarlama jasap qoiǵan. Endi partiia qujattaryn Ádilet ministrligine jiberý ǵana qalǵan".
Jiyn kezinde Oljas Súleimenov keleshekte Qazaqstanda orys tiliniń statýsy týraly máselesi kóterilýi múmkin ekenin eskertti.
– Biz qazir Ýkrainada ne bolyp jatqanyn kórip otyrmyz. 2014 jyly Ýkrainanyń darynsyz basshylary ýkrain tilin ǵana zańdy til dep jariialady, orys tilin zańsyz til dedi. Sonyń nátijesinde Ýkraina shyn mánine kelgende memlekettiginen aiyrylyp qaldy, – dedi ol.
"Qazaqstan Halyq kongresi" partiiasy alǵash ret 1991 jyly kúzde qurylyp, oǵan Oljas Súleimenov pen Muhtar Shahanov teń tóraǵa bolǵan. Olar partiiany liberal-demokratiialyq qundylyqtardy qoldaityn kúsh retinde sipattaǵan.
1993 jyly Muhtar Shahanov partiianyń teń tóraǵasy qyzmetinen ketip, Qazaqstannyń Qyrǵyzstandaǵy elshisi qyzmetine aýysty. Oljas Súleimenov 1994 jyly "bilikke konstrýktivti oppozitsiiaǵa kóshetinin" málimdep, Qazaqstan prezidenti Nursultan Nazarbaevtyń referendým arqyly óz ókiletin uzartqysy keletin áreketin synady.
"Referendýmyn paidalanyp, prezident óz mandatyn taǵy da uzartpaqshy. Sirá, óz biligindegi sailaý mashinasynyń múlt ketpeitin mehanizmine senetin bolar. Árine, 1991 jylǵy sailaýdaǵydai 99 protsent dep jar salýdyń yńǵaisyz ekenin prezident komandasy sezedi. Halyq buǵan senbeidi, óitkeni respýblikany talaý men qaiyrshylyqqa dýshar etken prezident saiasatyna kópshiligi qarsy daýys beredi" dedi ol 1994 jyly qarashada sheteldik aqparat quraldarynyń birine bergen suhbatynda.
1996 jyly ótýge tiis prezident sailaýyna kandidatýrasyn usynýǵa ázir ekenin aitqan Oljas Súleimenov 1995 jyly Italiiaǵa elshi bolyp ketti. Sodan keiin Qazaqstannyń halyq kongresi partiiasy saiasat sahnasynan shyǵyp qalǵan.
2010 jyly Nursultan Nazarbaevtyń ókilettigin 2020 jylǵa deiin referendým arqyly uzartý jónindegi bastamashyl toptyń úndeýine qol qoiyp, onyń ókiletin sailaýsyz sozýdy jaqtaǵan Oljas Súleimenov Qazaqstan halqyn Nursultan Nazarbaevty qoldaýǵa shaqyryp keldi.
Biyl 86 jasqa tolatyn Súleimenov Qańtar oqiǵasynan keiin Nazarbaevty synap, ony Qazaqstan konstitýtsiiasynda "táýelsiz Qazaqstannyń negizin salýshy" dep kórsetýge qarsylyq bildirdi.
Keiingi kezderi Qazaqstanda jańa saiasi partiia qurý jóninde bastamalar jiilegen. Birqatar saiasatkerler "El men Jer", "Bizdiń tańdaý" saiasi partiialaryn quratynyn málimdegen. Ádilet ministrliginiń málimetinshe, qazir "El tiregi", "Namys", "Baitaq", "Halyq derbestigi" partiialary tirkeý shartyn oryndaýǵa kirisken.
Ádilet ministrligi "Alǵa Qazaqstan" oppozitsiialyq partiiasyn qurý bastama tobynyń qujatyn tirkeýden bas tartqan. Buǵan deiin birneshe ret tirkele almaǵanyn málimdegen "Qazaqstannyń demokratiialyq partiiasynyń" jetekshisi Janbolat Mamai ózine qozǵalǵan eki qylmystyq is boiynsha ( “bilik ókilin qorlaý” jáne “jalǵan aqparat taratý”) qamaýda otyr. Onyń jaqtastary taǵylǵan aiyptyń saiasi astary bar dep esepteidi.
