Ministr óńirlerdegi mektepterdi aralaǵanyn aitty. Sol kezde ózi baiqaǵan ózekti máselelerdiń biri mektep ashanalarynyń jumysy bolǵan. Bul máselelerdi normativtik deńgeide sheshý úshin jumys toby qurylǵan.
"Bul baǵytta baqylaýǵa alynatyn jáne normativtik quqyqtyq aktiler deńgeiinde sheshiletin birneshe problema bar", - dep jazdy Aimaǵambetov áleýmettik jelide.
Birinshisi – qolma-qol aqshasyz tólem júiesiniń paidalanylmaýy.
Buǵan deiin ministrlik ashanalarda qolma-qol aqshasyz tólem júiesin engizý talabyn bekitken.
Ministrdiń aitýynsha, munyń birneshe artyqshylyǵy bar. Bul gigienanyń saqtalýyna ári kezektiń tez jyljýyna kómektesedi.
Sondai-aq balalarda qolma-qol aqshanyń bolmaýy olardy qaýipterden saqtaidy. Ata-analarǵa da shyǵyndy baqylaý ońaiyraq bolady. Biraq kóbinese qolma-qol aqshasyz tólem júieleri óshirilip, paidalanylmaidy.
Ekinshisi – býfet ónimderiniń quny.
Mektep ashanasynda 0,5 litr sý 300 teńgeden nemese bálishter men toqashtardyń dúkenderdegi baǵadan qymbatqa satylatyny suraq týyndatady. Bir qalada birdei ónim baǵasynda 50-70%-ke deiin aiyrmashylyq bolýy múmkin.
Úshinshisi – memlekettik-jekemenshik áriptestik.
"Keibir óńirler ashanalardy MJÁ (Memlekettik-jekemenshik áriptestik) arqyly jeke kásipkerlerge berip júr. Biz MJÁ-niń damýyn qoldaimyz. Biraq keide bul konkýrsty ótkizbeý úshin jáne ashanany kásipkerge tikelei (10-15 jylǵa) berý úshin jasalady", - deidi Aimaǵambetov.
Birinshiden, ol konkýrs ótkizilýi kerek dep sanaidy. Salym somasy az mólsherde, mysaly, 5-7 mln teńge emes, tiisti kólemde bolýy qajet. Bul qarajat tońazytqyshtar, plitalar, ústelder men oryndyqtardy satyp alýǵa jumsalady. Iaǵni, saiyp kelgende kásipker óz jumysyna qarajat salady.
"Sondai-aq biz jumystyń aqylǵa qonymdy merzimderin belgilegendi qoldaimyz. Ashanany 15-20 jylǵa kelisimshart jasaý suraq týǵyzady", - deidi vedomstvo basshysy.
Tórtinshisi – mektep ashanasynda Densaýlyq saqtaý ministrliginiń buiryǵymen tyiym salynǵan ónimderdi satý.
Mysaly, fastfýd, gazdalǵan sýsyndar, chipsy jáne taǵy basqa.
Aimaǵambetovtiń aitýynsha, ministrlik qyzmetkerleri birneshe oblysqa baryp, birqatar mektepte osyndai faktilerdi anyqtaǵan. Ásirese, Túrkistan oblysynda jii kezdesedi. Mundai faktiler anyqtalǵan jaǵdaida dereý SES organdaryna habarlaý qajet.
Ol osy problemalardy normativtik deńgeide sheshý úshin bilim ministrliginde jumys toby qurylǵanyn málimdedi. Zańnamaǵa birqatar tolyqtyrý engizýge bastama jasaldy, onyń aiasynda arnaiy normalar bekitiledi.
Bul normalar – ashanalardaǵy býfet ónimderiniń baǵasyn retteý, ashyq konkýrstar jáne aqylǵa qonymdy kezeńge MJÁ arqyly ashanalardy berý, qolma-qol aqshasyz tólemdi jáne tamaqtanýdyń tiisti sapasyn qamtamasyz etý.
"Biz kásipkerlerdiń de múddesimen sanasý kerek ekenin túsinemiz. Biraq biz úshin balalar árqashan birinshi orynda. Demek, bul olardyń quqyqtary men múddelerin qorǵaýdy bildiredi", - dep túiindedi Aimaǵambetov.
Ministrlik atalǵan baǵyttar boiynsha jumysty jalǵastyrady.
