Aqtaý qalasynyń ortalyǵynda ornalasqan botanikalyq baqtyń 50 jyldyq tarihy bar. 29 gektar jerdi alyp jatqan baqta 1300-den astam jasyl-jelektiń túri ósedi.
Onyń ishinde qylqan japyraqty ósimdiktiń 53 túri, ózgeaýdandyq ósimdiktiń 309 túri, jemis-jidektiń 127 túri bar. Sondai-aq 95-i jergilikti flora bolsa, 487 túri gúldi ósimdikter. Botanikalyq baq kollektsiiasynda raýshan gúldiń 146 túri bar.
Botanikalyq baq direktory Aqjúnis Imanbaevanyń aitýynsha, baqtaǵy ósimdikter dúniejúzilik botanikalyq baqtar men ortalyqtardyń genofondynan ákelingen.
Óńirimizge ákelingen ósimdikter aldymen beiimdelý synaǵynan ótedi, sodan keiin olardan assortiment ázirlenedi, keiin kógaldandyrýǵa synaqtan sátti ótken ósimdik túrleri usynylady.
Sondai-aq Aqjúnis Imanbaeva qala aýmaǵyn abattandyrýda botanikalyq baq mamandary jergilikti atqarýshy organdarǵa kómek kórsetýge daiyn ekenin aita kele, Aqtaý kóshelerine baqta ósetin ósimdikterdiń barlyq túrin, sonyń ishinde 200-den astam aǵash, 250-den astam ósimdik sortyn ósirýge bolatynyn aitty.
Ol úshin aimaqtyń ekologiialyq erekshelikterin eskere otyryp, jasyl jelekterdi kútip-baptaýdyń ǵylymi dáleldengen ádisterin qoldaný qajet.
Jumys saparynyń qorytyndysy boiynsha oblys ákimi jaýapty tulǵalarǵa botanikalyq baq mamandarynyń tájiribesin paidalanyp, qala aýmaǵyn kógaldandyrýda ǵylymi tásilderdi qoldanýdy tapsyrdy.
