Memleket basshysy Qasym-Jomart Toqaev Qazaqstannyń orta bilim berý júiesine jasandy intellektini engizý jónindegi jarlyqqa qol qoidy, dep habarlaidy dalanews.kz.
Qujattyń negizgi maqsaty — jasandy intellekt qarqyndy damyp jatqan kezeńde eldiń órkendeýin qamtamasyz etetin, adami kapitaldy damytýǵa yqpal etetin zamanaýi ári innovatsiialyq bilim berý júiesin qalyptastyrý.
Jarlyqqa sáikes Úkimet 2026 jyldyń 1 shildesine deiin orta bilim berý júiesine jasandy intellektini engizýdiń 2026–2029 jyldarǵa arnalǵan keshendi josparyn bekitýi tiis.
Qujatta derbes oqytý tetikterin damytý, tsifrlyq infraqurylymdy kúsheitý, pedagog kadrlardy daiarlaý jáne oqýshylardyń jeke málimetterin qorǵaý máseleleri qamtylady.
Sonymen qatar Jasandy intellektini damytý jónindegi keńes múshesi Li Kai-Fýdiń usynymdaryn paidalaný kózdelgen.
Úkimetke 2026 jyldyń 1 maýsymyna deiin qala men aýyl mektepteri arasyndaǵy bilim sapasy alshaqtyǵyn qysqartýǵa baǵyttalǵan pilottyq jobany iske qosý jáne ony keiin keńeitý boiynsha usynystar engizý tapsyryldy.
Al 2026 jyldyń 1 tamyzyna deiin pilottyq joba aiasynda mektepter tehnikalyq jaǵynan tolyq jabdyqtalýy kerek. Onyń ishinde turaqty ári joǵary jyldamdyqtaǵy internetpen qamtamasyz etý mindeti qoiylǵan.
2026 jyldyń 1 qyrkúiegine deiin orta bilim berý júiesinde jasandy intellektini qoldaný standarttary bekitiledi.
Sondai-aq osy merzimge deiin pedagogterdiń qyzmetin almastyrmai, jasandy intellektini qosymsha tiimdi qural retinde paidalaný tetikterin qamtityn arnaiy jospar qabyldanady.
Aqorda málimetinshe, jarlyq mátini resmi basylymdarda jariialanady.
