Almaty oblysy Talǵar aýdanynda ákesiniń qabirine baryp, Quran oqyp qaitqan 24 jastaǵy jigit pyshaq jaraqatynan kóz jumdy. Aldyn ala málimet boiynsha, qaiǵyly oqiǵaǵa jolǵa talas sebep bolǵan, dep habarlaidy dalanews.kz.
Bul týraly áleýmettik jelide jýrnalist Nurtai Lahan jazdy. Onyń málimetinshe, marqumnyń artynda eki qyzy qaldy. Politsiia oqiǵaǵa qatysy bar degen kúdikpen úsh adamdy ustaǵan.
Aýyl turǵyndarynyń aitýynsha, oqiǵa túngi ýaqytta bolǵan. Marqum inisimen birge on jyl buryn qaitys bolǵan ákesiniń ziratyna baryp, Quran baǵyshtap qaityp kele jatqan. Jolda olar kólik esikterin ashyp qoiyp, joldy bógep turǵan úsh jigitti kórgen.
Jigit joldan ótý úshin kóliktiń esikterin jabýdy suraǵan. Alaida oǵan dóreki jaýap qaitarylǵany aitylady.
Kýágerlerdiń sózinshe, marqum janjalǵa barmai, úiine qarai ketken. Biraq artynan qýyp kelgenderdiń biri oǵan pyshaqpen eki ret soqqy jasaǵan. Pyshaq jaraqaty ókpe tusyna tigeni aityldy. Shabýyl jasaǵan kúdiktiniń jasy shamamen 20-da bolǵan.
Almaty oblystyq politsiia departamenti Nura aýylynyń 24 jastaǵy turǵyny qaza tapqanyn rastady. Resmi aqparatqa sáikes, er adam 11 mamyr kúni aýrýhanada alǵan jaraqattarynan qaitys bolǵan.
"Habarlama túsken boida oqiǵa ornyna politsiia jasaqtary jiberilip, blok-beketter qoiyldy. Úsh kúdikti – marqumnyń aýyldastary ustaldy", – dep málimdedi politsiia.
Atalǵan derek boiynsha "Adam óltirý" jáne "Buzaqylyq" baptarymen qylmystyq is qozǵaldy. Kúdiktiler ýaqytsha ustaý izoliatoryna qamaldy.
