Sozaq aýdanyndaǵy Babata eldi mekenindegi az qamtylǵan otbasyǵa «Qazfosfat» JSHS-niń demeýshiligimen baspana berildi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Osy oraıda aýdan ákimi Muhıt Turysbekov jańa úıdiń kiltin tabystap, úı ıesin quttyqtady. Bes bólmeli baspanada sý jáne jylý júıeleri tolyqtaı ornatylǵan. Sondaı-aq, sharýashylyqty damytýǵa arnalǵan 20 sottyqtan astam jer telimi bar.

«Búgingi qýanysh – tek sizder úshin ǵana emes, barsha aýyl turǵyndary úshin de mańyzdy. Árbir adam óziniń shańyraǵynda baqytty bolýy tıis. Jańa úı – jańa múmkindikter, jańa bastama. Biz turǵyndardyń ál-aýqatyn jaqsartýǵa, qoǵamymyzdyń damýyna barynsha qoldaý kórsetemiz. Osylaısha biz birligimizdi nyǵaıtyp, elimizdiń bolashaǵyn birge qalyptastyramyz», – dedi aýdan basshysy Muhıt Seksenbaıuly.