Parijde Qazaqstan Prezidenti Qasym-Jomart Toqaevtyń Frantsiiaǵa memlekettik sapary aiasynda Gime Aziia óneriniń ulttyq mýzeiinde «Qazaqstan: Uly Dala jaýharlary» kórmesiniń saltanatty ashylý rásimi ótti, dep habarlaidy Dalanews.kz.
Ashylý saltanatynda Qazaqstan Respýblikasynyń Mádeniet jáne aqparat ministri Aida Balaeva álem tarihyndaǵy Uly dalanyń úsh myń jyldyq erekshe mádeni fenomenin pash etetin kórmedegi biregei eksponattardyń mańyzdylyǵyn atap ótti.
Ol frantsýz áriptesterine kórmeni uiymdastyrýǵa qoldaý kórsetkeni úshin alǵys bildirip, Qazaqstan men Frantsiia arasyndaǵy mádeni qarym-qatynastyń mańyzdylyǵyna erekshe toqtaldy.
«Keiingi jyldary Qazaqstan men Frantsiia arasyndaǵy bailanys artyp, jańa serpin aldy. Qazaqstan Prezidenti Qasym-Jomart Toqaev pen Frantsiia Prezidenti Emmanýel Makronnyń ózara saparlary ekijaqty yntymaqtastyqty nyǵaita tústi. Áriptesim, ministr hanym Rashida Dati men Gime mýzeiiniń prezidenti, doktor Iannik Linttske osy kórmeni uiymdastyrýda kórsetken qoldaýy úshin, sondai-aq, Gime mýzeii ujymyna joǵary deńgeidegi kásibi biliktiligi men úilesimdi jumysy úshin erekshe alǵysymdy bildiremin», – dedi Aida Balaeva.
Ekspozitsiiada Qazaqstannyń Ulttyq mýzeii men «Áziret Sultan» mýzei-qoryǵynyń kollektsiialarynan alynǵan 35 sirek artefakt usynylǵan. Olar Qazaqstan tarihynyń negizgi kezeńderin pash etedi.
«Mýzeidiń biik missiiasy – ótkenniń mádeni qundylyqtaryn kórsete otyryp, zamanaýi tarihty jasaý. Kórmege qoiylǵan eń qundy jádigerler alǵash ret sheteldik kórermenge zamanaýi, jańashyl formatta usynylyp otyr. Búgin biz jańa tarihtyń – elderimiz arasyndaǵy qarym-qatynastardyń damý tarihynyń kýási bolyp otyrmyz», – dedi ministr.
Kórermender kóshpeli mádeniettiń jáne memlekettiliktiń damýyn beineleitin qundy muralardy tamashalai alady, olardyń qatarynda ǵun-sarmat kezeńinen bastap Qazaq handyǵyna deiingi jádigerler bar. Kórmeniń ereksheligi – kórermenge Qazaqstan mádenietiniń sanǵasyrlyq tarihy men bai qazynasyn tereń tanýǵa múmkindik beretin immersivti mýltimediialyq kontent.
«Kórmede Qazaqstannyń bes «Djokondasy» qoilǵan. Bul kórmeniń ideiasy bir jyl buryn Frantsiia prezidentiniń Qazaqstanǵa sapary kezinde týyndady. Onyń maqsaty – kórermenge Qazaqstan mádenietin, onyń álemdik tarihta alar ornyn tanystyrý. Kórme ejelgi tarihtan bastap 18-shi ǵasyrdaǵy Qazaqstanǵa deiingi aralyqty qamtyǵan. Bul – Qazaqstannyń peizajdaryn, dybystaryn, ásirese, osy órkeniettiń bes kezeńin beineleitin bes shedevrdi nemese shedevrler ansamblin kórsetetin immersivti saiahat», – dedi Gime – Aziia óneriniń ulttyq mýzeii direktory Iannik Lints.
Kórme 2025 jyldyń 24 naýryzyna deiin jalǵasady. 5 qarashada, kórmeni Qazaqstan men Frantsiia Prezidentteri Qasym-Jomart Toqaev pen Emmanýel Makron tamashalaidy.
Aita ketý kerek, kórme jobasyna Qazaqstannyń Frantsiiadaǵy elshiligi, Bolat Ótemuratov qory men Alstom Kazakhstan kompaniiasy, Visor Group JShS jáne Keńes Raqyshev qoldaý kórsetti.
