Áielder kúresi boiynsha Aziia oiyndarynyń qola júldegeri Aisha Ýalishan kúieýimen birge 23 jastaǵy jigitti quldyqta ustady degen kúdikke ilindi, - dep habarlaidy Dalanews.kz Orda.kz-ke siltep.
Bul týraly 23 jastaǵy jigit Muqan Negmatov jýrnalisterge aityp bergen. Oqiǵa 2023 jyly bastalǵan. Sportshynyń kúieýi Muqanmen tanysyp, jalaqysy jaqsy jumys baryn aitqan.
"Ol maǵan 500-600 myń teńge tóleitin jumys baryn, eger kelissem jolǵa biletti de tólep beretinin aitty. Osylaisha qujattarymdy jinap, Túrkiiaǵa ushýǵa daiyndalyp júrdim. 28 qyrkúiekte Almatydan Astanaǵa keldim. Sosyn bir aýylǵa bardyq, ol jerge bara jatqanymdy bilmedim. Maǵan Álfarabi degen jigitke kómektesetinimdi, shóp kesetinimdi aitty. Arada bir apta ótse de áli jumysty bastamadyq. "Qashan kirisemiz?" dep suradym. Ol iship alyp, dosymen kelip, "iýjan, ejik, ketpeisiń bul jerden! Ketseń aqshań men densaýlyǵyńnan aiyrylasyń" dedi", - dep eske aldy Muqan.
Osylaisha jigit quldyqqa túskenin túsinip, qashpaq bolady. Biraq Muqan qashyp kete almaǵan, sebebi ony artynan kólikpen qýyp kelgen. Munymen qoimai ony uryp, "3 million teńge qaryzbyn" dep qolhat jazdyryp alǵan. Artynsha ony "óz erkimmen jumys istep júrmin" dep kameraǵa aitqyzǵan.
Muqan úidiń sharýasynan bólek "basshysynan" júieli túrde soqqy jep júrgen. Muqannyń sózinshe,ony kúrekpen de, aiyrmen de urǵan.
Muqan joq bolǵan ýaqytta ony týystary aýyryp júr dep oilaǵan. Sebebi ony quldyqta ustaǵan adamdar Muqannyń emine dep aqsha jinap júrgen. Biraq aqshanyń bári onlain-kazinolarǵa jumsalǵan. Odan bólek, 23 jastaǵy jigittiń atyna kóptegen mikronesie alynǵan.
Muqan kúnderdiń bir kúninde Dias degen jigittiń telefonyn alyp, qashyp úlgergen.
"Men Dias degen ańǵal jigittiń telefonyn alyp, aǵam Asqarǵa habarlastym. Aǵam "qashyp ket" dep Diasqa 10 myń teńge jibergen. Dias aqshany shyǵaryp, qoi qora jaqqa qarai ákelip berdi.
Men qashyp ketkenimmen aýyldan alys kete almadym. Eki kún boiy jańbyr quiyp turǵandyqtan qamystardyń arasynda tyǵylyp qaldym. Úshinshi kúni bári tynyshtalǵan soń, Qazposhtanyń kóligimen ortalyqqa qarai jetip, aǵammen bailanystym", - deidi Muqan.
Qazir Muqanǵa qaýip tónip turǵan joq. Alaida ony otbasy qylmyskerler jazasyz qala ma dep qorqyp otyr. Sondyqtan tártip saqshylarynan kómek suraǵan. Qazirgi tańda bul is boiynsha qylmystyq is qozǵalǵan.
