Almatyda dástúrli túrde qyrkúiektiń úshinshi jeksenbisinde toilanatyn Qala kúnine orai merekelik is-sharalar ótip jatyr. Qalanyń túrli alańdarynda kontsertter, festivalder, qoiylymdar jáne basqa da merekelik is-sharalar uiymdastyrylǵan, dep habarlaidy dalanews.kz.
Abai alańynda Otbasy Fest festivali bastaldy. Munda Almaty qalasynyń ákimi Darhan Satybaldy almatylyqtardy merekemen quttyqtady.
«Barshańyzdy Qala kúnimen shyn júrekten quttyqtaimyn! Almatynyń damýyna úles qosyp júrgen árbir turǵynǵa alǵys bildiremin. Halyqaralyq reiting agenttikteriniń zertteýlerine sáikes, Almaty Ortalyq Aziiadaǵy eń kórkem qala atanyp, jahandyq Ońtústiktiń jetekshi 30 qalasy qataryna endi. Memleket basshysy Qasym-Jomart Toqaev Almatynyń damýyna erekshe mán berip, onyń elimizdiń táýelsizdiginiń besigi retindegi tarihi mańyzyn atap keledi. Júrgizilip jatqan saiasattyń nátijesinde búginde shahar ekonomikasynyń kólemi 72 milliard AQSh dollaryna jetti. Qazaqstanǵa tartylatyn sheteldik investitsiialardyń 40%-dan astamy, eldegi jalpy ónimniń tórtten biri, al memlekettik biýdjet kiristeriniń úshten biri Almaty qalasyna tiesili», – dedi Darhan Satybaldy.
Almaty ákimi qalaǵa «baq-qala» mártebesin qaitarýdyń mańyzyn atap ótip, osy maqsatqa jetý úshin barsha turǵyndy atsalysýǵa shaqyrdy. Osy baǵytta qalalyq tálimbaqtar jelisi qurylyp, onda otyrǵyzýǵa arnalǵan kóshetter ósiriledi. 2030 jylǵa deiin qala kóshelerine, skverler men saiabaqtarǵa 1 millionnan astam aǵash egý josparlanǵan. Bul qalany aýqymdy jańǵyrtý jumystarynyń bir bóligi. Qazir kósheler men qoǵamdyq keńistikterde júrgizilip jatqan jóndeý jumystary aldaǵy jyldary Almatynyń zamanaýi kelbetin qalyptastyrady.
«Almaty árdaiym joǵary rýhaniiattyń, qoǵamdaǵy ózin-ózi ustaý mádenietiniń úlgisi bolyp keldi. Endi jańa qoǵamdyq ádepti qalyptastyrýǵa bárimiz jumyla kirisetin kez keldi. Onyń negizinde bir-birimizge degen qurmet, sezimdi ustamdylyqpen bildirý jáne joǵary azamattyq jaýapkershilik jatýy kerek. Naǵyz almatylyq rýhymyz osydan kórinýge tiis», – dedi Darhan Satybaldy.
Quttyqtaý sózinen keiin shahar basshysy Almatynyń damýyna eleýli úles qosqan 10 turǵynǵa «Almaty qalasynyń Qurmetti azamaty» ataǵyn berdi. Olardyń qatarynda eńbek ardagerleri, qoǵam qairatkerleri, mádeniet, qurylys jáne densaýlyq saqtaý salasynyń ókilderi, sondai-aq bilim, sport jáne kásipkerlik salasynyń mamandary bar.
Bul ataqqa eńbek ardageri, memleket qairatkeri Ǵainiken Bibatyrova, eńbek ardageri Klara Letnikova, dirijer ári kompozitor Murat Serkeev, sýretshi Amandos Aqanaev, sáýletshi jáne qala qurylysy mamany Orysbai Baimyrzaev, belgili hirýrg, qoǵam qairatkeri Orynbai Daiyrbekov, jeńil atlet, Qazaqstannyń jeńil atletikadan jattyqtyrýshysy Ámin Tuiaqov, QR UǴA akademigi, professor, meditsina ǵylymdarynyń doktory Bolatbek Baimahanov, memleket qairatkeri ári kásipker Qaldybai Qazanbaev jáne kórkeitý salasynyń ókili Aleksandr Kin ie boldy.
Merekelik baǵdarlama «Sazgen sazy» folklorlyq-etnografiialyq ansambliniń, Qazaq memlekettik tsirki artisteriniń, ASU toby men «Alataý» dástúrli óner teatry ujymynyń óner kórsetýimen jalǵasty. Kesh sońynda Ratovich kontserti jáne Best of NE PROSTO ORCHESTRA baǵdarlamasy usynylady.
Mýzykalyq baǵdarlamanyń basty is-sharalary Astana alańynda ótedi. Munda «Senim» vokaldyq hory, «Otyrar sazy» akademiialyq orkestri, «Rabat» ansambli, «Astra» toby, Muzart Life jáne basqa da oryndaýshylardyń qatysýymen merekelik kontsert uiymdastyrylady. Keshke Almaty Vibes mýzykalyq festivali bastalyp, onyń sahnasynda Maqpal Júnisova, Miras Júginisov, KALIFARNIYA, ALPHA, Aidana Medenova, Jandos Qarjaýbai jáne basqa da tanymal ónerpazdar óner kórsetedi.
20 qyrkúiekte Astana alańynda Almaty Zhuldyzy festivali ótedi. Kórermender aldynda Azamat Tórehan, Dana Kentai, Kesh You toby, ILHAN, «Dos-Muqasan» ansambli, Roza Rymbaeva, «Ialla» toby jáne basqa da oryndaýshylar óner kórsetedi. Keshtiń hedlaineri – álemge tanymal DJ IMANBEK.
Panfilov júrginshiler kóshesinde eki kún boiy dástúrli Alma Qala Fest festivali ótedi. Qonaqtarǵa balalar aimaǵy men etnoaimaq, ekologiialyq aimaq, kinoaimaq, Digital-aimaq, sport alańdary men fýdkort uiymdastyrylady. Festivaldiń basty is-sharalarynyń biri - áigili almatylyq aporttyń 200 tonnadan astamyn satý.
