Sońǵy bes jyldan beri Túrkiianyń Prezident janyndaǵy Kadrlyq basqarmasynyń úilestirýimen 10 túrli elde 15 ret jumys berýshiler men bolashaǵy bar jastardyń basyn qosatyn TalentforBIZ mansap jármeńkesi turaqty ótip keledi. Kúni keshe Almatyda ótken aitýly sharaǵa qatysqan el jastary da osyndai múmkindikke ie boldy.
Kezdesýge Túrkiia Respýblikasy Prezident basqarmasynyń «Mansap» ortalyǵy basshysy Salim Atai, Almaty qalasyndaǵy Túrkiia Bas konsýly Enver Mýderrisolý, túrik firmalary jáne mekemeleriniń ókilderi men jastar qatysty.
Túrkiia Respýblikasy Prezident basqarmasynyń «Mansap» ortalyǵy basshysy Salim Atai 34 jyl buryn alǵash ret qazaq jastarymen kezdesýdi eske aldy. Osy jyldar ishinde egemen eldiń jastary da ozyq oilap, óz armandaryna qanat qaǵýǵa asyq ekenin jetkizgen ol: «Sonaý 1990 jyldary stýdentter muǵalimdermen birge erip kelgen. Sol kezde kámelet jasqa tolǵan jastardyń ustazdarynyń jetegimen birge júrgenin túsine almai, tań qalǵanymyz bar. Búgin stýdentter ózderi bolashaǵyn ózderi boljap, aldaǵy josparlaryn jasaýǵa talpynystary táýelsiz bolǵanyn ańǵaryp otyrmyn. Olardyń boiyndaǵy talap-tilekteriniń táýelsiz bolýy halyqaralyq deńgeige shyǵýǵa talpysyntaryn ańǵartady» dedi.
Is-sharaǵa kelgen meimandar men jastarǵa TalentforBiz mansaptyq is-sharasynyń ashylý saltanatynda birge bolǵany úshin qýanyshty ekenin bildirgen Almaty qalasyndaǵy Túrkiia Bas konsýly Enver Mýderrisolý «Jyl saiyn ár túrli elderde úlken jetistiktermen uiymdastyrylatyn TalentforBiz mansaptyq is-sharalary álemniń ár túkpirinen kelgen talantty jastardy halyqaralyq arenada jumys isteitin túrik kompaniialary men mansaptyq múmkindikteri týraly aqparattandyrý maqsatynda ótkiziledi. Bul bizdiń kompaniialar úshin de, jastar úshin de jeńiske jetýge septigin tigizedi», dedi.
Sondai-aq ol kezdesýdiń mańyzdylyǵyn atap ótti. Onyń sózinshe, sharaǵa kelgen jastar ózderin qyzyqtyrǵan saýaldarǵa jaýap alyp, túriktiń tanymal kompaniialarynyń ókilderimen suhbattasýǵa múmkindik mol. Budan basqa, kompaniia ókilderi kelýshilermen túrli prezentatsiialar, aqparattyq sessiialar jáne kirispe kezdesýler ótkizip, óz kózqarastarymen bólisedi. Eger kompaniia talaby men jastardyń ótinishi bir jerden shyqsa, jumysqa ornalasýǵa jáne taǵylymdamadan ótýge ótinimder qabyldanady.
Osylai degen Bas konsýly: «Osyǵan orai men is-sharada óte joǵary brend qundylyǵymen usynylǵan qurmetti kompaniia ókilderine jáne elimizdiń ósýine, damýyna jáne órkendeýine eleýli úles qosyp kele jatqan barlyq isker adamdarymyzǵa alǵysymdy bildirgim keledi. Biz qazirdiń ózinde barlyq salalarda, ásirese bilim berý, saýda jáne ekonomika salalarynda berik ornyqqan bailanystarymyzdy odan ári nyǵaitylǵan strategiialyq seriktesimiz Baýyrlas Qazaqstanmen bailanystyramyz, olarmen tereń qarym-qatynastarymyz bar, olar óz kúshterin ortaq tarihi jáne mádeni bailanystardan alady», dedi.
Onyń aitýynsha, ekonomikalyq salada eki eldiń saýda kólemi 1992 jyly nebári 100 million dollardy qurady. Byltyr jyl sońyna qarai bul soma 6 milliard dollardan asty. Qos memlekettiń ortaq maqsaty – ekijaqty saýda kólemin qysqa merzimde 10 milliard dollarǵa deiin arttyrý. Bizdiń Túrkiiadan Qazaqstanǵa salǵan investitsiiamyz da búgingi kúnge deiin 6 milliard dollardan asty. Saýda men investitsiianyń mańyzdy bóligi Almaty qalasy men oblysyna da tiesili. Bizdiń azamattarymyzdyń basym kópshiligi Almatyda turady.
«Prezidentimizdiń basshylyǵymen túrik ǵasyryna degen kózqarasymyzdyń bir bóligi retinde biz ekijaqty qarym-qatynastarymyzdy odan ári nyǵaitýdyń, jármeńkelermen, saýda delegatsiialarymen, dalalyq zertteýlermen jáne ekijaqty saýda men investitsiialardy ulǵaitýdyń joldaryn izdep kelemiz. Onyń mysaly, búgingi is-sharadaǵydai tehnologiiamen qamtamasyz etilgen múmkindikterdi paidalanýǵa jol ashý. Sondyqtan yntymaqtastyqtyń mańyzdy múmkindigi retinde bul sharamyzdyń jemisti jáne tabysty bolýyn tileimin», dep túiindedi sózin Enver Mýderrisolý.
Aita ketý kerek, qos eldiń yntymaqtastyǵyn arttyrýǵa baǵyttalǵan kórmege Turkish Airlines, Turkish Aerospace Industries, Aselsan, Havelsan, Halk Bankasi, Türk Telekom siiaqty túrli salalardaǵy jetekshi túrik kompaniialary, sondai-aq Qazaqstanda jumys isteitin Abdi İbrahim, Esan Eczacibaşi, Ziraat Bankasi jáne Pro Yapi siiaqty kompaniialar qatysty. Munda kompaniia ókilderi men Qazaqstannyń jastary Túrkiianyń kadr resýrstaryn qurý jáne nyǵaitý salasyndaǵy tájiribesi men jetistikteri týraly egjei-tegjeili maǵlumat alyp, qos eldegi perspektivaly jastardyń mansabyn damytýǵa aitarlyqtai úles qosyp keledi.
