Pikirtalas úsh kezeńnen turdy. Birinshi sessiiasy saǵat 17.00-den 18.00-ge deiin stýdenttik konkýrs negizinde «Pikirtalastar mektebi» taqyrybynda uiymdastyryldy. Konkýrsqa aldyn ala irikteýden ótken Almaty qalasynyń Frantsýz aliansy jáne Sorbonna-Qazaqstan Institýtynyń bakalavriat jáne magistratýra stýdentteri qatysty.
Daýys berý jolymen pikirtalasqa qatysýǵa iriktelgen stýdentter men magistranttarǵa «Qalalyq nysanynyń menshik iesi arhitektýralyq sheshimder qabyldaýda erkindikke ie» taqyryby tańdaldy. Qazylar alqasynyń sheshimi men kórermenderdiń arnaiy Whatsapp nómeri arqyly daýys berý qorytyndysy boiynsha anyqtalǵan jeńimpazǵa konkýrs demeýshileriniń biri Air Astana áýe kompaniiasynan Astana-Parij-Astana baǵyty boiynsha tegin bilet berildi.
Qazylar alqasynyń quramynda Almaty qalasyndaǵy Frantsiianyń Bas Konsýlynyń ókilderi, pikirtalas plenarlyq sessiialarynyń qatysýshylary, UrbanTalks platformasynyń ókilderi bar. Daýys berý qorytyndysy boiynsha «Pikirtalastar mektebiniń» júldesin Janar Karipbekova, Azamat Jailaýbaev, Arailym Qalieva, Aliia Aqpaeva bastaǵan №1 komanda ókilderi jeńip aldy, al bas júlde Arailym Qalievaǵa tabystaldy.
Plenarlyq pikirtalastyń ekinshi sessiiasyna tarihshy, Shyǵys tilderi jáne órkenietteri ulttyq institýtynyń (INALCO) halyqaralyq yntymaqtastyq máseleleri jónindegi vitse-prezidenti Ann Grinberg, Parij-Didro Ýniversitetiniń halyqaralyq yntymaqtastyq máseleleri jónindegi vitse-prezidenti Antýan Kaze, Sorbonna-Qazaqstan Institýtynyń ǵylymi-zerteý qyzmetin úilestirýshi Laýra Turarbek, sánger Aika Álemi qatysty. Kezdesýdiń moderatory Frantsiianyń Ortalyq Aziiany zertteý institýtynyń (IFEAC) direktory Katrin Pýjol boldy. Qatysýshylar qazirgi álemniń ózekti máselelerin talqylady. Pikirtalastar frantsýz tilinde júrgizilip, qazaq jáne orys tilderine sinhrondyq aýdarma jasaldy.
Úshinshi plenarlyq pikirtalastyń sessiiasy «Biliktegi qiial: qalany ózgertýdegi ekologiialyq pikirler» taqyrybynda ótip, qazirgi zamanǵy ýrbanistikaǵa qatysty ózekti máselelerdi talqylandy. Bul taqyryp boiynsha pikiralmasýdy Frantsiianyń Ortalyq Aziiany zertteý institýtynyń (IFEAC) direktory Katrin Pýjol, áleýmettik ǵylym salasyn zertteýshi, CERI-SciencesRo Adrian Fov, «Forbes Kazakhstan» jýrnalynyń qazaqstandyq biznes boiynsha redaktory Ardaq Býkeeva, ónertanýshy, kórmelerdiń tálimgeri Valeriia Ibraeva, Tabiǵi tarih murajaiynyń qurmetti prezidenti Jil Biof, Urban Talks platformasynyń negizin qalaýshy Anel Moldahmetova qyzdyrdy.
Rimma Janbaeva
https://dalanews.kz/33421
