Joldaýyn júzege asyrýda jumyla áreket etedi
Qazaqstanda saiasat sahnasyndaǵy jańa jyldy Elbasy Joldaýymen bastaý dástúri qalyptasqan. Biyl da bolashaqqa baǵdar tastar mańyzdy memlekettik qujatty buqara joǵary yqylaspen qabyl aldy. Mindet pen meje aiqyn, júzege asyrar ynta men yntymaq kerek. Joldaýdyń ár baǵyty boiynsha Shyǵys óńirinde de jumystar júielenip, jaýaptylarǵa júkteldi. Aita ketý kerek, kei baǵytta óńir ózgelerden kósh ilgeri. Máselen, birinshi «Qazaqstan indýstriiasy jańa tehnologiialardy engizýdiń kóshbasshysyna ainalýy tiis» baǵyty boiynsha oblysta biregei bastamalar ótken jyly qolǵa alynǵan. Aimaq basshysy Danial Ahmetovtyń tapsyrmasymen el ishinde balamasy joq tantal men niobiiden inplantattardyń joǵary tehnologiialyq óndirisi bastaldy. Atalmysh ónim aldaǵy tańda Qazaqstanǵa tek otandyq emes, sonymen qatar reseilik naryqty da igerýge múmkindik beredi.
Tórtinshi baǵyt – «Kólik-logistika infraqurylymynyń tiimdiligin arttyrý» boiynsha oblysta respýblikalyq ǵana emes, sonymen qatar halyqaralyq mańyzdaǵy joldar salynyp, jańartylýda. Temir joldar da jańa baǵdarlarǵa bastaýda. Úndi, Japoniia jáne basqa elderdiń investorlarymen aitarlyqtai jumys júrgizilýde. Joǵary jyldamdyqpen Semeidegi áýejaidyń ushý-qoný jolaǵy qalpyna keltirilýde. Óskemenniń de áýejaiynda jańǵyrtý jumystary júrgizildi.
Aktiv barysynda oblys ákimi Danial Ahmetov Elbasy Joldaýynyń mańyzdylyǵy toqtala otyryp, jaýapty organdarǵa birqatar tapsyrmalar berdi.
– El Prezidenti Nursultan Ábishuly Nazarbavetyń jyl saiynǵy Joldaýynda qoiylǵan mindetter el jańǵyrýyna jańa serpin beredi. Ony iske asyrý jolynda árqaisysy óz salasynda belsene atsalysýy kerek. Barlyq jumystar júieli, naqty josparlanǵan, tiimdi bolýy qajet, – dedi aimaq basshysy Danial Ahmetov.
Aktivtiń jumysyna barlyq deńgeidegi ákimder, basqarma, departament basshylary, quqyq qorǵaý organdary, kásiporyndar, kásipkerler, azamattyq qoǵam institýttarynyń ókilderi qatysty. Bailanys jáne aqparattyq tehnologiialar, densaýlyq saqtaý, bilim berý, aýyl sharýashylyǵy salalarynyń, sondai-aq jastar resýrstyq ortalyǵynyń ókilderi Elbasynyń Joldaýy aiasynda óńirde júzege asyrylyp jatqan jumys josparlarymen bólisti.
Alqaly basqosýǵa kelgender Joldaý negizinde ekonomikany arttyrýǵa, áleýmettik salany damytýǵa, sonymen qatar investitsiia kólemin ulǵaitýǵa, jańa jumys oryndaryn qurý, kásiptik-tehnikalyq bilim berý baǵytyndaǵy is-sharalar legimen tanysty.
ShQO ákiminiń baspasóz qyzmeti
