Jıynda óńir basshysy ótken jyly pandemıaǵa qaramastan óńirdiń áleýmettik-ekonomıkalyq damýy oń qarqynyn saqtap qalǵanyn atap ótti.
– Oblysta COVID-19 indetine qarsy halyq densaýlyǵyn saqtaý, syrqattanǵandar sanynyń kúrt ósýine jol bermeý, ınfeksıanyń taralýyn báseńdetý boıynsha jumystardy birinshi orynǵa qoıdyq. Sonyń nátıjesinde qazirgi ýaqytta epıdemıologıalyq jaǵdaı turaqty. Aýrýdyń ortasha ósýi 0,2% quraıdy. Óńirde ýaqtyly jáne sapaly medısınalyq kómek kórsetý úshin 41 ınfeksıalyq stasıonar jumys isteıdi, tolyq medısınalyq jabdyqtalǵan 6300 tósek-oryn uıymdastyrylǵan, – dep atap ótti SHQO ákimi D. Ahmetov.
Jalpy, ótken jyly óńirdiń densaýlyq saqtaý salasyn damytýǵa barlyǵy 37,3 mlrd teńge bólindi. Qosymsha 174 ÓJJ, 10 rentgen-apparaty, úsh EKMO, úsh kompúterlik tomograf satyp alyndy.
Óńir basshysynyń aıtýynsha, bıyl medısına qyzmetkerleriniń biliktiligin úzdiksiz arttyrý jalǵasady. Ótken jyly ıadrolyq medısına, sondaı-aq Altaı men Aıagóz ınsýlt ortalyqtarynyń, Ana men bala medısına mekemesiniń janyndaǵy ońaltý bóliminiń dárigerleri oqýdan ótti. Aýyldyq, aýdandyq aýrýhanalarda bosandyrýdyń kúrdeli jaǵdaılarynda jumys isteýge múmkindik berý úshin qyzmet deńgeıin arttyrý josparlanǵan.
– Aýylda jerlerde, aýdandarda perınataldyq saladaǵy kórsetkishterdiń tómendigi jáne medısınalyq mekemelerdiń jetkiliksiz jabdyqtalýy ózekti másele. Áıelder men jańa týǵan nárestelerge medısınalyq kómektiń sapasyn arttyrý jáne qoljetimdilikti qamtamasyz etý maqsatynda úsh aýyldyq aýrýhananyń bosandyrý qyzmetin I deńgeıge, toǵyz aýdanda ekinshi jáne eki aýdanaralyq aýrýhanany I deńgeıge aýystyrý josparlanǵan. Bul neǵurlym bosandyrýdyń kúrdeli jaǵdaılaryn ótkizýge jáne 1500 gramnan shala týǵan sábılerdi kútýge múmkindik beredi. Óskemen jáne Semeı qalalarynyń perzenthanalary bolsa, III deńgeıli jabdyqtarmen qamtamasyz etiledi. Osy eki qalada 500 gramdyq shala týǵan sábılerdi kútýge múmkindik týady, – dedi D. Ahmetov.
Sondaı – aq, Balalar men eresekterge arnalǵan Gematologıa ortalyǵynda medısınalyq týrızmdi damytýǵa negiz bolatyn, ıadrolyq medısına men robottandyrylǵan hırýrgıany biryńǵaı júıege biriktiretin qýatty medısınalyq klaster qurylady.
