Advokat Dmitrii Kýriachenkonyń sózine qaraǵanda, Nur-Sultan qalasynyń tergeý soty 12 aqpanda Birtanovtyń úiqamaq merzimin naýryz aiynyń sońyna deiin uzartqan. Advokat 22 aqpanda Toqaevqa úndeý joldaǵanyn da habarlaǵan. «Biraq úndeýimdi oǵan jetkizbei qoia ma dep qorqamyn» dedi advokat agenttikke.
49 jastaǵy Eljan Birtanov 2017 jyldyń qańtarynan biylǵy maýsym aiynyń sońyna deiin Densaýlyq saqtaý ministri qyzmetin atqarǵan. Ol koronavirýspen aýyrǵandar sany kúrt kóbeiip, aýrýhanalarda oryn jetpei qalǵan tusta otstavkaǵa ketken. Onyń ornyna Aleksei Tsoi qyzmetke keldi, al Birtanov el kózine túspei ketti.
Byltyr qarashada onyń «iri kólemde qarjy jymqyrý» kúdigi boiynsha ustalǵany habarlandy. Sol kezde birqatar jergilikti BAQ Birtanovtyń tsifrlandyrýǵa bólingen 526 million teńge kóleminde (1,2 million dollar) qarajatty «iemdendi» dep aiyptalǵanyn jazdy.
Birtanov ustalǵannan keiin áleýmettik jelide ony qoldaý aktsiialary ótti. Qoldanýshylar bilikten ony bosatýdy suraǵan.
Qańtar aiynda sot onyń úiqamaq merzimin 28 aqpanǵa deiin sozǵan edi.
Birtanov komandasynda ministrdiń orynbasary bolyp jumys istegen Oljas Ábishev byltyr tamyzdyń basynda qamaldy. Keiinirek burynǵy vitse-ministrge aqparattyq júieler qurý úshin bólingen 500 mln teńgedei qarajatty jymqyrdy degen aiyp taǵylǵany belgili boldy.
Qazaqstan – TMD-da koronavirýstan eń kóp zardap shekken elderdiń biri. Sarapshylardyń kóbi buǵan jemqorlyq, densaýlyq saqtaý salasyndaǵy ashyqtyqtyń joqtyǵy siiaqty jaittar sebep boldy degen tujyrym jasaǵan.
