ادۆوكات دميتريي كۋرياچەنكونىڭ سٶزٸنە قاراعاندا, نۇر-سۇلتان قالاسىنىڭ تەرگەۋ سوتى 12 اقپاندا بٸرتانوۆتىڭ ٷيقاماق مەرزٸمٸن ناۋرىز ايىنىڭ سوڭىنا دەيٸن ۇزارتقان. ادۆوكات 22 اقپاندا توقاەۆقا ٷندەۋ جولداعانىن دا حابارلاعان. «بٸراق ٷندەۋٸمدٸ وعان جەتكٸزبەي قويا ما دەپ قورقامىن» دەدٸ ادۆوكات اگەنتتٸككە.
49 جاستاعى ەلجان بٸرتانوۆ 2017 جىلدىڭ قاڭتارىنان بيىلعى ماۋسىم ايىنىڭ سوڭىنا دەيٸن دەنساۋلىق ساقتاۋ مينيسترٸ قىزمەتٸن اتقارعان. ول كوروناۆيرۋسپەن اۋىرعاندار سانى كٷرت كٶبەيٸپ, اۋرۋحانالاردا ورىن جەتپەي قالعان تۇستا وتستاۆكاعا كەتكەن. ونىڭ ورنىنا الەكسەي تسوي قىزمەتكە كەلدٸ, ال بٸرتانوۆ ەل كٶزٸنە تٷسپەي كەتتٸ.
بىلتىر قاراشادا ونىڭ «ٸرٸ كٶلەمدە قارجى جىمقىرۋ» كٷدٸگٸ بويىنشا ۇستالعانى حابارلاندى. سول كەزدە بٸرقاتار جەرگٸلٸكتٸ باق بٸرتانوۆتىڭ تسيفرلاندىرۋعا بٶلٸنگەن 526 ميلليون تەڭگە كٶلەمٸندە (1,2 ميلليون دوللار) قاراجاتتى «يەمدەندٸ» دەپ ايىپتالعانىن جازدى.
بٸرتانوۆ ۇستالعاننان كەيٸن ەلەۋمەتتٸك جەلٸدە ونى قولداۋ اكتسييالارى ٶتتٸ. قولدانۋشىلار بيلٸكتەن ونى بوساتۋدى سۇراعان.
قاڭتار ايىندا سوت ونىڭ ٷيقاماق مەرزٸمٸن 28 اقپانعا دەيٸن سوزعان ەدٸ.
بٸرتانوۆ كومانداسىندا مينيستردٸڭ ورىنباسارى بولىپ جۇمىس ٸستەگەن ولجاس ەبٸشەۆ بىلتىر تامىزدىڭ باسىندا قامالدى. كەيٸنٸرەك بۇرىنعى ۆيتسە-مينيسترگە اقپاراتتىق جٷيەلەر قۇرۋ ٷشٸن بٶلٸنگەن 500 ملن تەڭگەدەي قاراجاتتى جىمقىردى دەگەن ايىپ تاعىلعانى بەلگٸلٸ بولدى.
قازاقستان – تمد-دا كوروناۆيرۋستان ەڭ كٶپ زارداپ شەككەن ەلدەردٸڭ بٸرٸ. ساراپشىلاردىڭ كٶبٸ بۇعان جەمقورلىق, دەنساۋلىق ساقتاۋ سالاسىنداعى اشىقتىقتىڭ جوقتىعى سيياقتى جايتتار سەبەپ بولدى دەگەن تۇجىرىم جاساعان.
