Shyǵysta Ulttyq dombyra kúni atalyp ótti. Merekelik is-sharalar táýlik boiy jalǵasty.
Keshkisin oblystyq sáýlet-etnografiialyq jáne tabiǵi-landshaft mýzeiiniń alańynda elimizdiń úzdik dombyrashylary men estrada juldyzdary óner kórsetti.
Aita ketelik Ulttyq dombyra kúni alǵash ret byltyrǵy jyly toilandy, mundaǵy maqsat ulttyq qundylyqtardy ulyqtaý, qazaqtyń tarihy men mádenietin dáripteý.
Dombyra men kúi óneri adamzattyń mádeni murasy retinde IýNESKO tizimine engen. Osynaý aitýly kúni qazaqtyń ulttyq aspabynan kúmbirlep shyǵar qońyr úndi estip, kúi qudiretinen qýat alý úshin mýzei-qoryqtyń aldyna jinalǵan Óskemen turǵyndary keshten erekshe áser aldy.
ShQO ákimi simfonikalyq orkestriniń jetekshisi ári bas dirijeri Aleksandr Galsanovtyń atap ótkenindei ónerpazdar turǵyndardy tań qaldyrý úshin osy keshke uzaq ýaqyt boiy ázirlengen.
– Bul óte jaýapty shara, 80 adamnan turatyn eki orkestrdiń dombyranyń qos ishegindei úndesip, óner kórsetýi úshin kóp ter tóktik. Bizdiń oryndaýymyzdaǵy týyndylar tyńdarman júreginen oryn aldy dep senemin. Festival ekinshi jyl ótýde, Qazaqstan úshin onyń mańyzy erekshe. Sebebi dombyra degenimiz qazaqtyń jany. Dombyra bizdiń orkestrdiń negizgi aspaby, - deidi ol.
Sahnada simfoniialyq jáne Baijigit atyndaǵy qazaq halyq aspaptar atyndaǵy orkestrynan bólek estrada juldyzdary óner kórsetti.
Belgili ánshi Erkin Shúkimannyń oryndaýynda "Án dombyra", «Dombyra saǵan ókpem joq», «Saǵyndym Altai» ánderi shyrqalsa, Aibek Bekbosynov Elbasyǵa arnalǵan kúi oryndady, onyń oryndaýyndaǵy Qurmanǵazynyń "Saryarqasy" jáne "Kóktemniń on jeti sáti" týyndylary kóptiń kóńilinen shyqty.
– Dombyra qazaqtyń kieli murasy. Kúishiler qadym zamannan beri qadirin joǵaltqan joq. Dombyranyń qońyr úni arqyly qazaqtyń mádeni murasy men dástúrin dáripteimiz. Eshbir mýzykalyq aspap saiyn dalanyń daýsyn dál dombyradai jetkize almaidy. Osynaý dástúrdiń sabaqtasyp, urpaq-urpaqqa jetkenin qalaimyn, – dedi Aibek Bekbosynov.
Keshke kelgen kórermender áýezdi án-kúige bólenip qana qoimai, dombyra týraly tanymyn keńeitetin suraq-jaýap saiysyna da qatysty.
Keshtiń sońynda «An. Sal. Dar» toby halyq ánderin oryndap, oǵan kórermender de qosylyp merekelik sharanyń shymyldyǵy túrildi.
