Ertic Promenade-taǵy «Kúmbirle-kúi dombyra» kontsertine Rústembek Omarov atyndaǵy qazaq ulttyq aspaptar orkestri jáne Isa Baizaqov atyndaǵy oblystyq filarmoniianyń oryndaýshylary qatysty. Oblystyń 150 kúishisi dombyramen jandy daýysta orkestrdiń súiemeldeýimen Qurmanǵazynyń «Balbyraýyn» kúiin oinady.
13 jasar Táttigúl Qasym Ertis aýdanynan óner mektebiniń basqa balalarymen birge kelgen.
- Biz ózimizdiń dombyra ansamblimizben merekege keldik, - deidi Táttigúl. – Men Ertic Promenade-ta óner kórsetkenimmen maqtanamyn. Dombyra oinaýmen tórtinshi jyl ainalysyp kelemin. 15-ten astam kúidi úirendim. Oǵan qosa, vokal jáne horeografiiany unatamyn.
Rústembek Omarov atyndaǵy orkestrdiń bas dirijeri jáne orkestrdiń kórkemdik jetekshisi, Qazaqstannyń mádeniet qairatkeri Talǵat Kárimovtiń aitýynsha, ótken jyly óner ujymy Dombyra kúninde arnaiy shaqyrtýmen elordada óner kórsetken.
Biyl orkestrlikter osy kúndi pavlodarlyqtarmen birge atap ótýde. Merekege orai orkestr mýzykalyq syilyq daiyndaǵan.
- Biz alǵash ret orkestrdiń súiemeldeýimen gitarada jáne áriptesimiz Rizolla Sadyqovpen dombyrada Nurǵisa Tilendievtiń «Álqissa» kúiin oinaimyz, - deidi gitarashy Artem Aleksandrov.
– Aldymen tek dombyranyń daýysy shyǵady. Gitaranyń jáne dombyranyń rólderin bólip alǵanbyz. Gitaranyń perneleri basqasha keltirilgen. Sondyqtan dombyranyń qulaq kúiin gitaraǵa keltirdik. Kórermenderge unaidy dep úmittenemiz.
Sonymen qatar, Ertic Promenade sahnasynda «Sherniiaz» ben «Nur» bi toptary jáne filarmoniianyń oryndaýshylary – Jibek Aitpaeva, Rýslan Jumabaev, Baiyrjan Ahmetov, Natalia Protskaia, Madiiar Bahtiiarov, Saltanat Temirhanova óner kórsetti.
Aita keteiik, Ulttyq dombyra kúnine orai orkestr Rústembek Omarovtyń «Ásem án men tátti kúi» shyǵarmasyn oryndap #DombyraChallenge chellendjin bastaǵan. Chellendjdi oblystyń barlyq shyǵarmashylyq toptary qoldaǵan.
Sondai-aq Buqar jyraý atyndaǵy ádebiet jáne óner mýzeiinde, oblystyq kórkemsýret mýzeii men Maira Shamsýtdinova atyndaǵy án-óner shyǵarmashylyǵy murajai úiinde kórme ashyldy.
