Qazaqstanda alǵash ret Astana AI Film Festival ótip, birden álemdik aýqymdaǵy sharaǵa ainaldy. 125 elden túsken 8 067 ótinim ony jasandy intellekt kómegimen jasalǵan kino týyndylary arasyndaǵy eń iri halyqaralyq baiqaýǵa ainaldyrdy, dep habarlaidy dalanews.kz.
Búgin elordada jeńimpazdar jariialandy.
Gran-pri men $450 myńdy Latviiadan kelgen Nikolay Shestak «The First Honest Day» filmi úshin ielendi. Is-áreketterińiz syrtqy kelbetińizdi tikelei ózgertetin álemdi elestetip kórińiz: jamandyq jasasańyz – ajarsyzdanasyz, jaqsylyq jasasańyz – qulpyra túsesiz. Jeńimpaz mundai marapatty kútpegenin, al júlde qarjysyn jańa filmder túsirýge jumsamaq ekenin aitty.
Qazaqstandyq Myrzahan Jumahan «Úzdik keiipker» nominatsiiasynda jeńiske jetti. Onyń «It Was Just a Joke» komediiasynda it pen onyń iesiniń aǵasy bir ázildiń kesirinen janjaldasyp qalady. Oqiǵanyń ary qaraiǵy órbýi naǵyz blokbasterden kem emes. Avtordyń ózi prank pen kóńildi jaqsy kóretinin, sondyqtan osyndai oqiǵany túsirgenin aitady.
Ekinshi oryn jáne $200 myń – Úndistannyń «SITARA» filmine buiyrdy. Úshinshi oryn men $100 myńdy ispaniialyq «Looking For Perseida» ielendi.
Myńdaǵan ótinimniń ishinen finalǵa nebári 25 jumys ótti. Olardy halyqaralyq qazylar alqasy baǵalady. Onyń quramynda IýNESKO-nyń burynǵy basshysy Odri Azýle jáne investor Baladji Srinivasan boldy.
Festivaldiń jalpy júlde qory – $2 mln: onyń jartysy júldelerge, qalǵan jartysy perspektivaly AI-komandalardy qoldaýǵa jáne Qazaqstandaǵy óndiristi damytýǵa baǵyttalady.
JI kómegimen jasalǵan filmder búginde úlken ekranda kórsetilip, júzdegen myń dollar kólemindegi júldelerge ie bolyp jatyr. Astana mundai festivaldi alǵash ret qabyldap, álemniń túkpir-túkpirinen kelgen úzdik jumystar tańdalatyn alańǵa ainaldy.
