Kaspii teńizindegi áskeri oqý-jattyǵý kezinde bolǵan qaiǵyly jaǵdaidan aman qalǵan atyraýlyq sarbaz Beket Myrzaǵaliev merzimdi áskeri qyzmetin aiaqtap, týǵan jerine oraldy, dep habarlaidy dalanews.kz.
Sarbazdy Atyraý áýejaiynan ata-anasy, týǵan-týystary men dostary kútip aldy. Jaqyndary onyń aman-esen elge oralǵanyna qýanyp, sarbazdy qushaq jaia qarsy alǵan.
Beket Aqtaýdaǵy №29011 áskeri bóliminde qyzmet atqarǵan. Ol qyrkúiekte Mańǵystaý oblysynda bolǵan áskeri oqý-jattyǵý kezinde aman qalǵan sarbazdardyń biri.
Keiin Beketke áskeri boryshyn óteý kezinde kórsetken erligi men janqiiarlyǵy úshin «Erligi úshin» medali tabystalǵan.
Eske salaiyq, 24 qyrkúiekte Kaspii teńizindegi áskeri oqý-jattyǵý barysynda aýa raiy kenetten kúrt nasharlap, 17 áskeri qyzmetshini teńiz aǵysy alyp ketken. Úsheýi aman qalǵan, 14 áskeri qyzmetshi qaza tapty.
Oqiǵaǵa bailanysty qylmystyq is qozǵalyp, tergeý bastalǵan. Úkimettik komissiia da qurylyp, istiń mán-jaiyn anyqtaý jumystary júrgizilgen.
