Ertic Promenade-تاعى «كۇمبىرلە-كۇي دومبىرا» كونسەرتىنە رۇستەمبەك وماروۆ اتىنداعى قازاق ۇلتتىق اسپاپتار وركەسترى جانە يسا بايزاقوۆ اتىنداعى وبلىستىق فيلارمونيانىڭ ورىنداۋشىلارى قاتىستى. وبلىستىڭ 150 كۇيشىسى دومبىرامەن جاندى داۋىستا وركەستردىڭ سۇيەمەلدەۋىمەن قۇرمانعازىنىڭ «بالبىراۋىن» كۇيىن وينادى.
13 جاسار تاتتىگۇل قاسىم ەرتىس اۋدانىنان ونەر مەكتەبىنىڭ باسقا بالالارىمەن بىرگە كەلگەن.
- ءبىز ءوزىمىزدىڭ دومبىرا انسامبلىمىزبەن مەرەكەگە كەلدىك، - دەيدى تاتتىگۇل. – مەن Ertic Promenade-تا ونەر كورسەتكەنىممەن ماقتانامىن. دومبىرا ويناۋمەن ءتورتىنشى جىل اينالىسىپ كەلەمىن. 15-تەن استام كۇيدى ۇيرەندىم. وعان قوسا، ۆوكال جانە حورەوگرافيانى ۇناتامىن.
رۇستەمبەك وماروۆ اتىنداعى وركەستردىڭ باس ديريجەرى جانە وركەستردىڭ كوركەمدىك جەتەكشىسى، قازاقستاننىڭ مادەنيەت قايراتكەرى تالعات كارىموۆتىڭ ايتۋىنشا، وتكەن جىلى ونەر ۇجىمى دومبىرا كۇنىندە ارنايى شاقىرتۋمەن ەلوردادا ونەر كورسەتكەن.
بيىل وركەسترلىكتەر وسى كۇندى پاۆلودارلىقتارمەن بىرگە اتاپ وتۋدە. مەرەكەگە وراي وركەستر مۋزىكالىق سىيلىق دايىنداعان.
- ءبىز العاش رەت وركەستردىڭ سۇيەمەلدەۋىمەن گيتارادا جانە ارىپتەسىمىز ريزوللا سادىقوۆپەن دومبىرادا نۇرعيسا تىلەندييەۆتىڭ «ءالقيسسا» كۇيىن وينايمىز، - دەيدى گيتاراشى ارتەم الەكساندروۆ.
– الدىمەن تەك دومبىرانىڭ داۋىسى شىعادى. گيتارانىڭ جانە دومبىرانىڭ رولدەرىن ءبولىپ العانبىز. گيتارانىڭ پەرنەلەرى باسقاشا كەلتىرىلگەن. سوندىقتان دومبىرانىڭ قۇلاق كۇيىن گيتاراعا كەلتىردىك. كورەرمەندەرگە ۇنايدى دەپ ۇمىتتەنەمىز.
سونىمەن قاتار، Ertic Promenade ساحناسىندا «شەرنياز» بەن «نۇر» بي توپتارى جانە فيلارمونيانىڭ ورىنداۋشىلارى – جىبەك ايتپايەۆا، رۋسلان جۇمابايەۆ، بايىرجان احمەتوۆ، ناتاليا پروسكايا، ماديار باحتياروۆ، سالتانات تەمىرحانوۆا ونەر كورسەتتى.
ايتا كەتەيىك، ۇلتتىق دومبىرا كۇنىنە وراي وركەستر رۇستەمبەك وماروۆتىڭ «اسەم ءان مەن ءتاتتى كۇي» شىعارماسىن ورىنداپ #DombyraChallenge چەللەندجىن باستاعان. چەللەندجدى وبلىستىڭ بارلىق شىعارماشىلىق توپتارى قولداعان.
سونداي-اق بۇقار جىراۋ اتىنداعى ادەبيەت جانە ونەر مۋزەيىندە، وبلىستىق كوركەمسۋرەت مۋزەيى مەن مايرا شامسۋتدينوۆا اتىنداعى ان-ونەر شىعارماشىلىعى مۇراجاي ۇيىندە كورمە اشىلدى.
