Qorǵanys ministrligi áskeri qyzmetshilerge tólenetin járdemaqy men túrli tólemderdiń tártibine ózgeris engizdi. Tiisti buiryq 21 sáýirden bastap kúshine endi, dep habarlaidy Dalanews.kz.
Vedomstvonyń málimetinshe, biýdjet qarajatyn únemdeý esebinen áskeri qyzmetshilerge beriletin materialdyq kómek kólemi ulǵaitylǵan. Endi tólemderdiń eń tómengi mólsheri eldegi eń tómengi jalaqy deńgeiine teńestiriledi.
Jańa qaǵidaǵa sáikes, jaqyn týysy, jubaiy nemese qaiyn jurtynan jaqyn adamy qaitys bolǵan jaǵdaida beriletin áleýmettik kómek eń tómengi jalaqynyń bes esesine deiin jetip, shamamen 425 myń teńgeni quraýy múmkin.
Sondai-aq neke qiiý, bala týý nemese bala asyrap alý, múlikke zalal kelý jáne em-dom qajet bolǵan jaǵdailarda áskeri qyzmetshilerge shamamen 255 myń teńge kóleminde áleýmettik tólem qarastyrylǵan.
