Almatynyń ortalyǵyndaǵy «Double Tree by Hilton Almaty» qonaqúii bir kezderi kásipker Sholpan Qaraneevadan reiderlik jolmen tartyp alynǵan. Qonaqúi Qairat Satybaldynynyń qolyna túsip úlgergen bolatyn. Bul kezde eks-prezident Nursultan Nazarbaevtyń nemere inisi túrmede otyrǵan. Tergeýde jáne ýaqytsha ustaý izoliatorynda bolǵanyna qaramastan, ol qujattarǵa qol qoiyp, qonaqúige qol jetkizgen. Kásipker Sholpan Qaraneeva men advokaty Asqar Ýteshov Satybaldyuly reiderlik shabýyldy qalai jasaǵanyn baiandap berdi, - dep habarlaidy Dalanews.kz.
Sholpan Qaraneeva Almatynyń qaq ortasynda Hilton qonaqúiin salýdy sheshken. 2018 jyly Capital bankten nesie suraǵan. Ol úshin qonaqúidi kepilge qoiǵan. Bank áli jumys istemegen qonaqúidi 10 milliard dep baǵalaidy. Keiinnen pandemiia bastalyp, qonaqúi qyzmeti toqtap qalǵan. Pandemiia aiaqtalyp, jumys qaita jandanǵannan keiin Qaraneeva bankten qaryzdy keiinge qaldyrýdy suraidy. Bank qarsy bolyp, nesieni 2025 jylǵa deiin jaýyp tastaýdy mindetteidi. Osylaisha bank zańsyz áreketer jasai bastaǵan kórinedi.
Sholpan Qaraneevanyń sózinshe, qonaqúi kollektorlardyń qolyna ótip ketken. Al kollektorlar óz kezeginde qonaqúidi Satybaldyulyna satyp jibergen. Iaǵni kollektor Zakirianova saýda-sattyq júrgizip, ony jaramsyz dep tanyp, qonaqúidi jekeshelep jibergen. Bir aidan keiin «Baidala.B» kompaniiasy paida bolǵan. Antikordyń málimetinshe, bul Satybaldyulymen seriktes kompaniia bolyp shyqqan. Kompaniianyń quryltaishysy – Qulbaev esimdi tulǵa. Bul kompaniia kollektordan qonaqúidi ielenedi. Iaǵni kollektor qonaqúidi kompaniiaǵa ótkizip jibergen.
Qaraneevanyń advokaty Asqar Ýteshov Qairat Satybaldyuly kásipkerge qalai qoqan-loqy kórsetkenin aityp berdi. Onyń sózinshe, Gollivýd filmindegidei shabýyl jasalǵan. Saqaldy, qysqa balaqty 50-ge jýyq adam ashýlanyp kelip, qonaqúidi qorshap alǵan.
«Kelip alyp, bárin buǵattai bastady. Onyń ishinde, eń aldymen ortalyq server jabyldy. Beinebaqylaý kameralary da óshirildi. Olar tek bir kamerany baiqamai qaldy. Sóitip olar ár qabatty aralap, qyzmetkerlerge «Eshteńeden qoryqpańyzdar, tek basshylyq aýysyp jatyr. Ol sizderge áser etpeidi, tipti jalaqylaryńyzdy kóterýimiz múmkin. Al Qaraneevany qudai bilsin» degen. Iaǵni bank óz jumysyn istegen. Endigi kezek – Satybaldyulynda bolǵan.
Sol kúni Satybaldyuly birneshe kúzetshimen qonaqúige keledi. Bir kezde konferents-zalda namaz oqyp aldy. Sosyn áielimen birge qonaqúidi aralai bastady. Qonaqúidiń bastyǵy siiaqty júrdi. Biz olardyń áreketi zańǵa qaishy ekenin aita bastadyq. Eshqandai organ ún qatpady. Úndemedi. Sebebi bári qorqatyn», - deidi advokat Orda.kz-ke bergen suhbatynda.
Bul qańtar oqiǵasyna deiin, 2021 jyldyń 26 jeltoqsanynda bolǵan jaǵdai. Qańtar oqiǵasynan keiin bul oqiǵanyń «ekinshi bólimi» bastalǵan.
«Biz jazǵan aryz boiynsha aqyry qylmystyq is qozǵaldy. Tergeý bastaldy. Qonaqúidiń baǵasyna qatysty saraptama júrgizeiik dedik. Osylaisha kásipker Sholpan Qaraneeva jábirlenýshi bolyp tanyldy. 10 ai boiy tyrnaqsha ishindegi tergeý júrgizile bastady. Prokýror Aýǵambaev basynda biz aityp otyrǵan jáne keltirip otyrǵan dáleldermen kelisip turǵanymen keiinnen ol oiynan ainyp qaldy. Iaǵni biz kórsetken bap boiynsha qylmys jasalmaǵanyn aityp, isti jaýyp tastady», - deidi advokat Asqar Ýteshov.
«Qańtar oqiǵasynan keiin eshteńe ózgergen joq, bári joǵarydan buiryq kútip otyrady», - deidi kásipker Sholpan Qaraneeva.
Aita keteiik,2022 jyly naýryzda Satybaldyuly shetelge qashyp bara jatqan jerinen ustalǵan bolatyn. Búginde ol birneshe bap boiynsha aiyptalyp, múlki tárkilenip, alty jylǵa bas bostandyǵynan aiyryldy.
2023 jyly jeltoqsanda Qairat Satybaldyuly 55 milliard teńgeden asa aqshany memleketke qaitarǵan bolatyn. Antikor Qairat Satybaldyulyna jáne basqa da adamdarǵa qatysty júrgizilip jatqan tergerý sheńberinde elden zańsyz shyǵarylǵan aktivterdi, onyń ishinde qylmystyq jolmen alynǵan aqshany jáne ózge de múlikti qaitaryp jatqanyn habarlaǵan bolatyn.
Keiinnen Satybaldyulyna qatysty sotqa deiingi tergeý amaldary aiasynda biyl aqpan aiynda biýdjetke taǵy da shamamen 82,6 milliard teńge (185 mln AQSh dollary) tústi. Budan bólek, Aqmola oblysynyń Qosshy qalasyndaǵy 942 gektar jer ýchaskesi memleketke qaitaryldy. Onyń naryqtyq quny 13 milliard teńgeden asady.
