Jýrnalıs, qoǵam belsendisi Dına Elgezek áleýmettik jelidegi paraqshasynda Eltańba aýystyrý ıdeıasyna pikir bildirip, "Nazarbaev murasynan" qutylý degen sóz shyn máninde ne maǵyna bildiretinin aıtty, - dep habarlaıdy Dalanews.kz.

"Gerbten qutylý - Nazarbaevtyń murasynan qutylý" depti keshe bir aǵamyz.
Jansyz atrıbýt bizge nendeı qaýip týǵyzýy múmkin? Nonsens qoı…

Nazarbaevtyń murasy eltańba emes, Nazarbaevtyń murasy - Toqaevtyń qasynda júrgen Nazarbaevtyń jemqor komandasy!
Nazarbaevtyń murasy - energetıkalyq resýrstardyń qojaıyny - olıgarhıalyq top!
Nazarbaevtyń murasy - elge qaıtpaǵan aktıvter!
Nazarbaevtyń murasy - ádiletsiz sot, bılikke táýeldi BAQ!

Eldigimizdiń sımvolyn ótirik ózgertip, "Jańa Qazaqstannyń" jalǵan ımıtasıasyn jasaǵansha, "eski júıeniń zańdy muragerimiz" dep moıyndaı salsańdarshy…" - dep jazdy ol.

Aıta keteıik, buǵan deıin Dına Elgezek Ashat Asylbekovke bergen suhbatynda Darıǵa Nazarbaeva men Rahat Álıev qazaq halqynyń taǵdyryna qalaı áser etkenin aıtty.

"1999 jyldyń sońynda 2000 jyldardyń basynda (Habarǵa - esk.) keldim. Sol kezde basshymyz (Álıev pen Nazarbaeva - esk.) boldy. Shynyn aıtqanda, ótken 30 jylǵa qaraımyz, qazaq halqynyń kórgen qorqynyshty túsindeı eken. Osy erli-zaıypty - qazaq halqyna, taǵdyryna áser etken tulǵalar.

Baılyqtan, ashkózdikten medıalardy satyp alyp jatty.

Sóz bostandyǵy qysymǵa ushyrady. Demokratıa degen nárseni umyta bastadyq.

Prezıdenttiń ózinde eki túrli tańdaý turdy: avtokratıalyq apan, ekinshisi demokratıalyq tańdaý degen. Biraq Nursultan Nazarbaev óziniń otbasyn tańdady, onyń otbasy avtokratıalyq rejımdi tańdady.

Odan keıingi nebir sumdyq tarıh, reıderlik jasap otyrdy. Balalaryna sheksiz bılik berý arqyly Nazarbaevtyń taǵdyry nemen aıaqtaldy?!" - dedi jýrnalıs.

Sonymen qatar, qoǵam belsendisi qazaqtyń jaǵdaıyn kimder turalatqanyn da ataǵan edi.

"Bizde úsh túrli trıada - jemqorlar, Nazarbaevtyń klany jáne otbasy. Osy úshbasty aıdahar memleketimizdiń túbine jete jazdady. Osynyń ishinde memlekettiń taǵdyryna áser etken osy eki tulǵa (Álıev pen Nazarbaeva - esk.) boldy. ...Qatty aıtqanym emes, bular qazaq halqyn quldyqta ustady dep aıtýǵa bolady. Qazaq halqynyń qojaıyny bola bastady", - dedi jýrnalıs.