Týrizm jáne sport ministri Erbol Myrzabosynov Úkimettegi brifing barysynda Qaraǵandy oblysynyń dene shynyqtyrý jáne sport basqarmasynyń basshysy Serik Sápiev pen onyń orynbasary Dáýren Esimhanov arasyndaǵy janjalǵa qatysty pikir bildirdi, dep habarlaidy Dalanews.kz.
Jýrnalister ministrden aldaǵy ýaqytta sportshylardy memlekettik qyzmettegi basshylyq laýazymdarǵa taǵaiyndaý jalǵasa ma degen suraq qoidy.
"Barlyq sportshy-olimpiada chempiondaryn jappai qyzmetke taǵaiyndap jatqandai áser qalyptasqan. Negizinde olardy saýsaqpen sanap shyǵýǵa bolady. Memlekettik qyzmette jumys istegen nebári eki olimpiada chempiony ǵana bar", - dedi Myrzabosynov.
Ministrdiń aitýynsha, bul azamattar belgili bir basqarý jolynan ótken.
"Olar depýtat boldy, aýdan ákimi qyzmetin atqardy, sport basqarmalaryn basqardy. Búginde ózderi týyp-ósken, tárbielengen ortasyna qaita oralyp, sol óńirlerde sportty damytýǵa atsalysyp júr. Sondyqtan bul jaǵdaidy tek sportshylarmen bailanystyrýdyń qajeti joq dep oilaimyn. Qazirgi tańda Memlekettik qyzmet isteri agenttigi tergeý júrgizip jatyr. Qorytyndysy boiynsha bizge naqty sheshim aitylady", - dep tolyqtyrdy ministr.
Eske salaiyq, buǵan deiin Serik Sápiev soqqyǵa jyǵylyp, orynbasary tergeýge alynǵanyn habarlaǵan edik.
Artynsha jelide oqiǵanyń videosy tarady. Serik Sápiev sol kúni daýly oqiǵaǵa bailanysty málimdeme jasaǵan edi.
Bul oqiǵaǵa bailanysty Qaraǵandynyń Sport basqarmasynda aýdit júrgiziledi.
