2025 jyldyń 12 sáýirinde Almaty tehnologiia jáne floristika kolledjinde «Salt - dástúrim – taýsylmaityn bailyǵym» atty is-shara dúrkirep ótti.
Kóktemniń jyly lebimen qatar keletin Ulystyń uly kúni Naýryz meiramynan aiǵa jýyq ýaqyt ótse de merekelik kóńil-kúi áli de shýaqty kúnderden esip tur. Almaty tehnologiia jáne floristika kolledjinde ótken merekelik is-shara sonyń aiqyn dáleli. Naýryz meiramyn aýqymdy toilaý arqyly ulttyq dástúrdi jańǵyrtyp, jas urpaqqa qazaq halqynyń bai mádeni murasyn tanytýdy maqsat etip otyr.
Naýryzdyń mánin tereńirek túsinýge, ulttyq dástúrlerdi jańǵyrtýǵa jáne de ulttyq oiyndardyń mańyzyn arttyrý úshin asyq atý, arqan tartý, qazaq kúresi siiaqty oiyndar oinatylyp jatsa, kieli sahnada tusaýkeser dástúri kórsetildi. Tusaýkeserdi «Ónerli analar» tobyndaǵy aq kimeshek kigen apalarmyz, M.Áýezov atyndaǵy Qazaq ulttyq drama teatrynyń ártisi Shynar hanym men kolledj direktory Nýrymbetov Anarbek Qaldaruly rásimdi jasady.
Keibir dástúrlerdiń umytylýy nemese ózgerýi qazirgi zamannyń talaptaryna sai bolyp otyr. Degenmen, osy dástúrlerdi jańǵyrtý jáne qaita jandandyrý arqyly ulttyq qundylyqtardy saqtaý, jastar arasynda ulttyq sanany qalyptastyrý múmkindigi bar. Umytylǵan dástúrlerdi zerttep, olardyń tárbielik jáne mádeni mánin túsindirý úshin mereke aiasynda ulttyq qolóner kórmesi arnaiy uiymdastyrylǵan. Qazaq halqynyń bai murasymen tanysyp, kiiz úi ishindegi turmystyq buiymdardy, zergerlik óner týyndylaryn, sondai-aq dástúrli kiim úlgilerin tamashalaýǵa bolady.
Odan bólek, «Ár istiń ustasy bar, ár ustanyń ustazy bar» degendei el ishinde ár istiń óz sheberi bary anyq. «Balam ónerli bolsyn deseń, ónegeńdi kórset» -degen naqyl sózdi ustanǵan, óziniń ismerligimen, sheberligimen kókirek kózimizdi oiatqan, qolónerdiń ári men nárin qanymyzǵa sińirgen altyn qoldy analarymyz urshyq iirý, jún sabaý, syrmaq syrý, keste tigý siiaqty ónerlerin kórsetip, tilimiz, dilimiz, dinimiz, ádet-ǵuryp, salt-dástúrimiz, qolónerimiz qazaq dúnietanymynda ajyramas uǵymdar ekenin kórsetip jatty.
Qazaqtyń qasietti qolóneri - kóne tarihpen birge ósip, bite qainasqan bai qazyna. Ulttyq dástúrimiz ben ulttyq qolóner buiymdarynyń, ádet-ǵuryptardyń búgingi qoǵamda ómir súrip, qaita jańǵyrýy mańyzdy. Ata-babamyzdan jetken rýhani qundylyqtarymyzdy, onyń ishinde aǵashtan jasalǵan buiymdardyń eń kóp taraǵan túri – keli men kelsap, kúbi jáne qol diirmenmen tanystyryp, kórsetip jatsa, endi biri qamshy órý óneri syi-syiapattyń tóresi, er jigittiń serigi, aibyny, shańyraqtyń kiesi, tipti, keide batyrdyń qarýy da bolǵandyǵyn dáriptep, úiretip jatyr.
Naýryz meiramymen qatar Qazaqstan halqy Assambleiasynyń qurylǵanyna 30 jyl tolýyda atalyp ótildi. Birlik, tatýlyq jáne yntymaq – eldigimizdiń myzǵymas tuǵyry hám memleketimizdiń basty qundylyǵy. Ultaralyq tatýlyqty nyǵaitýda Qazaqstanda turyp jatqan 130-dan asa ult pen ulys ókilderi tatýlyqta ómir súrip jatyr desek, sonyń ishinde atalǵan kolledjde 19 ult ókilderiniń bilim alyp jatqany da sonyń dáleli ispetti.
Atalǵan, is - shara barysynda stýdentter ár ulttyń ulttyq kiimin kiip, sol ulttyń ónerin kórsetti. Sonymen qatar, «Ónerli analar» tobyn bastaǵan Botan apamyz «Qazaq osy» ánimen, odan bólek, merekelik kóńil - kúi syilaý úshin sahna tórine alystan qonaq bolyp, jyly lebizderi men ónerlerin ala kelgen uiǵyr men ázirbaijan ulttarynyń ókilderi, Marýpov Vamýq «Jananim» ánin arnasa, «Assambleia jastary» Nizamova Tolýnai Azatovna merekemen quttyqtady.
Almaty tehnologiia jáne floristika kolledjiniń ónerli stýdentteri ásem ánnen shashý shashyp, myń burala bilese, kórshiles «Sán jáne moda dizain» kolledjinen arnaiy stýdentter kelip, kúmbirlegen kúimen, keshtiń sánin kirgizdi. Merekege kelgen qonaqtar men ata-analarǵa, stýdentterge tegin kóje taratylyp, baýyrsaq úlestirildi.
Osylaisha, Almaty tehnologiia jáne floristika kolledjinde birneshe is-sharanyń basyn biriktirgen «Salt - dástúrim – taýsylmaityn bailyǵym» dep, salt dástúrlerdi dáripteý maqsatynda ádemi kesh atalyp ótti.
Baqyt Sydyqova
