Forýmdy aýdan ákimi Sarybaev Ǵaliasqar Tólendiuly ashyp, aýdanymyzdaǵy kópbalaly ákelerdi quttyqtap, baǵaly syilyqtarmen marapattady. Forýmǵa Qazaqstan Halqy Assambleiasynyń hatshylyǵy - etnosaralyq qatynastar jónindegi bóliminiń basshysy Surabaldinova Sáýle Alhanqyzy, Almaty oblystyq Analar Keńesiniń tóraiymy Baimadieva Jamal Qasymbekqyzy qatysty.
"Barlyq ákeler óziniń qara shańyraǵynda «Táýelsizdik bárinen qymbat!» degen bir aýyz sózdi máńgi uran etip, bala sanasyna sińirip tárbieleýimiz qajet dep esepteimin. Birligimiz ben yntymaǵymyz myǵym bolsa, barlyq qiyndyqty jeńip, maqsatymyzǵa jetemiz. Táýelsiz eldiń alar asýy kóp, shyǵar shyńy biik bolsyn. Qasterli Táýelsizdigimiz asqaqtai bersin.
Sizderdi «Rýhtyń kúshi ákede» atty forýmymen quttyqtai otyryp, otbasyna amandyq, denderińizge saýlyq, kúsh-jiger, eńbekterińizge tabys pen parasattylyq tileimin!", - dedi aýdan ákimi Ǵ. Sarybaev.
Is-sharada aýdan ákiminiń arnaiy marapatymen aýdanymyzdyń kópbalaly ákeleri Baibolattegi Nurahmet Qajy, Álippiev Saǵyndyq Dúisenuly, Sadvaqasov Sársenbai Sýidýuly marapattaldy.
10 bala tárbielep, ulyn uiaǵa, qyzyn qiiaǵa qondyrǵan ardaq áke Baibolattegi Nurahmet qajy atamyz da aqjarma batasyn berdi.
Búginde Nurahmet qajy atamyz 24 nemere, 10 shóbere ósirip, qanattyǵa qaqtyrmai, tumsyqtyǵa shoqtyrmai ómirde óz oryndaryn tabýlaryna jol kórsetken danagói áke. Atamyzdyń jolyn jalǵastyryp kele jatqan 13 balanyń ákesi Sadvakasov Sársenbai Súidýuly jáne 9 balanyń ákesi Álpiev Saǵyndyq Dúisenuly.
Júzdegen mamandyq pen kásip túri bar. Alaida onyń ornyn toltyrýǵa bolmaityn bir ǵana mamandyq, ol – áke bolý. «Bir ákeniń tárbiesin júz
mektep bere almaidy» degen naqyl sózder «áke» mamandyǵynyń
qadir-qasietin bir aýyz sózben-aq uǵyndyryp turǵandai.
Kerbulaq aýdandyq analar keńesiniń tóraiymy Aqbasova Ǵaliia Niiazovna:
"Ákeniń aqyly kerek eken,
Taptyrmas oi-sana beredi eken.
Altynnan jazylǵan úsh áripke.
Ómirde esh nárse teńelmegen", - degen óleń joldaryn arnady.
Táýeldizdigimizdiń mereitoiy aiasynda Ákelerimizdi ardaqtap, olardyń erligi men ónegesin jastarymyzǵa jáne qoǵam arnasyna pash etýimiz kerek.
Sol sebepti jiynǵa qatysýshylardyń nazaryna arnaiy ákeler týraly túsirilgen beine rolik usynylyp, sahnada "Bala qalaýy" atty qoiylym kórsetildi.
Sondai-aq jiynǵa qatysýshylarǵa arnalǵan merekelik kontserttik baǵdarlama usynylyp, aýdandyq mádeniet úiiniń ánshileri ákeler týraly án aitty.
Áke – asqar taý. Ár shańyraqta ákeniń orny bólek. Áke – sol shańyraqtyń bar aýyrtpalyǵyn kóteretin, asyrap-baǵýǵa da, jaqsy tálim-tárbie berýge de mindetti adam. Áke bul– otbasy múshelerin ártúrli pále-jaladan qorǵap otyratyn qamqorshy.
Sondyqtan ákeni syilaý, oǵan úlken qurmetpen, iltipatpen qaraý balanyń paryzy bolmaq.
Forýmnyń maqsaty ákeniń minez – qulqy, ózgelermen qarym – qatynasy, óneri men bilimi – balanyń kóz aldyndaǵy úlgi, ónege alatyn, oǵan qarap ósetin nysanasy ekenin uǵyndyrý. Otbasyndaǵy áke ornyn, rólin kórsete otyryp, halyqtyq tárbie negizderine toqtalý; úlkenderdi syilaýǵa, ákeni pir tutýǵa, áke men er azamat uǵymynyń mánin uǵynýǵa tárbieleý.
Kerbulaq aýdany ákiminiń baspasóz qyzmeti
