Onyń pikirinshe Jambyl oblysynyń ákimi Saparbaevtyń jyldyq esebinde jerge gúrs etip qulaǵan gerb, Shyǵystaǵy topsasy túsken esik ilýde bir bolatyn kezdeısoqtyq emes. Munyń bári kózboıashylyqtyń, sapasyzdyqtyń, jemqorlyqtyń saldary.
"Oblystyń eń laýazymdy tulǵalarynyń aldynda osylaı qırap jatsa, basqa jaqta ne bolyp jatqanyn bir Qudaıdyń ózi biledi. Bes balanyń ólimi taǵdyrdyń isi deımiz. Biraq halyqty durys jumyspen qamtamasyz etý, olardyń oqyp-bilýlerine barynsha jaǵdaı jasaý, elge baǵyt-baǵdar berip, jan-jaqty jetildirý, sapaly ult qalyptastyrý memlekettiń jaýapkershiligindegi dúnıe", – deıdi qaıratker.
Qaırat Joldybaı eldiń jaǵdaıyn jaqsartyp, eńsesin tikteý úshin 30 jyl da jetkilikti edi degen pikirde. Alaıda osy otyz jylda bılik túk tyndyrmaǵan. El ekonomıkasy kóterem kúıde, shyqpa janym shyqpa dep ázer otyr.
"Jalpy ekonomıka joq. Jasandysynyń ózi quldılap qulady. Demografıalyq ósim de, ulttyq ıdeologıa da joq. Tilimizdiń esikten syǵalaǵan sıqy anaý. Táýelsiz sot júıesi bolǵan emes", – deıdi ol.
Onyń paıymdaýynsha saıası júıe áýelden durys jasalmaǵan. Júıe bir kisige baılanǵan. Memlekettiń bar baılyǵy tonalǵan. Jemqorlyq bar salany jaılaǵan.
"Kedeı halyqtyń sany kún sanap artýda. Qymbatshylyq qysyp barady. Dinniń ózi saıasılanyp, áldebir mekemelerdiń qýyrshaǵyna aınaldy. Oı aıtyp, “qoı” deıtin zıaly qaýym jaǵympazdyqpen jarysyp, madaq-marapattyń sońynda júr. Sonda otyz jyldy qalaı atap ótýimiz kerek ózi?
Marqum Altynbek Sársenbaıulynyń: “zaýytty, qalany qaryzdanyp bolsa da salýǵa bolady. Biraq qandaı qoǵam, nendeı júıe qalyptastyrdyń? Jetistik osymen ólshenýi kerek” degen sózi oryndy aıtylǵan aqıqat sóz!", – deıdi Qaırat Joldybaı.
