ونىڭ پىكىرىنشە جامبىل وبلىسىنىڭ اكىمى ساپاربايەۆتىڭ جىلدىق ەسەبىندە جەرگە گۇرس ەتىپ قۇلاعان گەرب، شىعىستاعى توپساسى تۇسكەن ەسىك ىلۋدە ءبىر بولاتىن كەزدەيسوقتىق ەمەس. مۇنىڭ ءبارى كوزبوياشىلىقتىڭ، ساپاسىزدىقتىڭ، جەمقورلىقتىڭ سالدارى.
"وبلىستىڭ ەڭ لاۋازىمدى تۇلعالارىنىڭ الدىندا وسىلاي قيراپ جاتسا، باسقا جاقتا نە بولىپ جاتقانىن ءبىر قۇدايدىڭ ءوزى بىلەدى. بەس بالانىڭ ءولىمى تاعدىردىڭ ءىسى دەيمىز. ءبىراق حالىقتى دۇرىس جۇمىسپەن قامتاماسىز ەتۋ، ولاردىڭ وقىپ-بىلۋلەرىنە بارىنشا جاعداي جاساۋ، ەلگە باعىت-باعدار بەرىپ، جان-جاقتى جەتىلدىرۋ، ساپالى ۇلت قالىپتاستىرۋ مەملەكەتتىڭ جاۋاپكەرشىلىگىندەگى دۇنيە"، – دەيدى قايراتكەر.
قايرات جولدىباي ەلدىڭ جاعدايىن جاقسارتىپ، ەڭسەسىن تىكتەۋ ءۇشىن 30 جىل دا جەتكىلىكتى ەدى دەگەن پىكىردە. الايدا وسى وتىز جىلدا بيلىك تۇك تىندىرماعان. ەل ەكونوميكاسى كوتەرەم كۇيدە، شىقپا جانىم شىقپا دەپ ازەر وتىر.
"جالپى ەكونوميكا جوق. جاساندىسىنىڭ ءوزى قۇلديلاپ قۇلادى. دەموگرافيالىق ءوسىم دە، ۇلتتىق يدەولوگيا دا جوق. ءتىلىمىزدىڭ ەسىكتەن سىعالاعان سيقى اناۋ. تاۋەلسىز سوت جۇيەسى بولعان ەمەس"، – دەيدى ول.
ونىڭ پايىمداۋىنشا ساياسي جۇيە اۋەلدەن دۇرىس جاسالماعان. جۇيە ءبىر كىسىگە بايلانعان. مەملەكەتتىڭ بار بايلىعى تونالعان. جەمقورلىق بار سالانى جايلاعان.
"كەدەي حالىقتىڭ سانى كۇن ساناپ ارتۋدا. قىمباتشىلىق قىسىپ بارادى. ءدىننىڭ ءوزى ساياسيلانىپ، الدەبىر مەكەمەلەردىڭ قۋىرشاعىنا اينالدى. وي ايتىپ، “قوي” دەيتىن زيالى قاۋىم جاعىمپازدىقپەن جارىسىپ، ماداق-ماراپاتتىڭ سوڭىندا ءجۇر. سوندا وتىز جىلدى قالاي اتاپ ءوتۋىمىز كەرەك ءوزى؟
مارقۇم التىنبەك سارسەنباي ۇلىنىڭ: “زاۋىتتى، قالانى قارىزدانىپ بولسا دا سالۋعا بولادى. ءبىراق قانداي قوعام، نەندەي جۇيە قالىپتاستىردىڭ؟ جەتىستىك وسىمەن ولشەنۋى كەرەك” دەگەن ءسوزى ورىندى ايتىلعان اقيقات ءسوز!"، – دەيدى قايرات جولدىباي.
