Qazaqstandyq sot-meditsinalyq saraptama qyzmetkeri Tahir Halimnazarov reseilik áriptesteriniń Saltanat Núkenovanyń ólimine bailanysty shyǵarǵan sheshimine qatysty pikir bildirdi, dep habarlaidy Dalanews.kz.
Birneshe kún buryn reseilik sarapshylar qazaqstandyq mamannyń tujyrymdamasyn joqqa shyǵarǵan bolatyn. Bishimbaevtyń advokattary sotta Máskeý qalasyndaǵy "N.I. Pirogov atyndaǵy Resei ulttyq zertteý meditsinalyq ýniversitetiniń" reseilik sot-meditsinalyq sarapshylarynyń qorytyndysyn baiandap, Núkenova bas miynyń aýyr jaraqaty saldarynan qaitys bolmaǵanyn jetkizdi. Olar Saltanattyń ólimine deiin 3-4 apta buryn alǵan eski gematomadan basta qan ketýi sebep bolǵanyn habarlaǵan edi.
Al Tahir Halimnazarov sheteldik áriptesteriniń mundai sheshimine daiyn bolǵanyn aitady.
"Bul jaǵdaidy kútkenbiz. Sebebi bul bizdiń praktikada bar. Olardyń jazǵanyna súiensek, munda qylmys bolmaǵan bolyp tur. Iaǵni, basta qan ketip, sonyń áserinen qaitys boldy degen qorytyndyǵa keldi", - deidi sarapshy Dina Tólepbergenge bergen suqbatynda.
Aitýynsha, bul saraptama emes, tek eki mamannyń – qorytyndysy.
"Men aityp kettim ǵoi. Bul – saraptama emes. Bul tek eki mamannyń – kózqarasy. Birinshiden, bul kisiler reseilik bir memlekettik mekemeniń atynan shyǵyp turǵan joq. Bul eki tulǵanyń jasaǵan qorytyndysy. Ol týraly reseilik meditsinalyq ýniversitet dep jazyp jatyr. Biraq ol ýniversitettiń atynan bergen joq. Tek ózderiniń atynan berip tur. Onyń bárin olar tegin jasamaidy. Eń basty nárse sol bolyp tur", - deidi Halimnazarov.
Alaida ol reseilik áriptesteriniń bul jumysy úshin qansha qarajat alǵanyn ashyp aita almady.
"Men ony aita almaimyn. Óitkeni bul jerde bizdiń sarapshylarǵa, bizdiń mamandarǵa tólegen aqsha emes. Munda endi kóp shyǵar dep oilaimyn", - dedi ol.
Onyń sózinshe, ózge eldiń sarapshylary jasaǵan qorytyndynyń basqa memlekette kóp jaǵdaida salmaǵy bolmaidy.
"Qazaqstan mamandarynyń qortyndysy Máskeýdegi sotta nemese Reseidiń basqa qalalarynda qaralǵanyn kórdińiz be? Ony eshkim qaramaidy. Óitkeni olar biledi. Bul – basqa memleket. Mundai qorytyndyny bergen mamandardyń jaýapkershiligi úlken bolýy kerek. Al bul jerde ol kisilerde jaýapkershilik bar dep aita almaimyn. Tanystym dep jazǵanymen, sol jaýapkershilikti olardan eshkim suramaidy.
Men ekinshi Týmanov degendi kórgenmin. Abai oblysyndaǵy bir jaǵdailarǵa bailanysty Qazaqsatanǵa kelgen edi. Biraq sol kezde ol kisiniń jazǵanyn eshkim qabyldamady, mán bermedi. Óitkeni zańsyzdyq dep tanyldy", - dedi sarapshy.
Eske salaiyq, buǵan deiin eks-ministr Qýandyq Bishimbaevqa qatysty kezekti sot otyrysynda sot-meditsina eksperti Tahir Halimnazarov Núkenovanyń ólimine sebep bolǵan jaraqattardy manekende kórsetken bolatyn.
Tahir Halimnazarovtyń sózinshe, bul jaraqattar Núkenovanyń máiitin saraptaý nátijesinde anyqtaldy.
Iaǵni, alǵashqy saraptamany júrgizgen sarapshylar anyqtaǵan. Bul jaraqattar sarapshynyń qorytyndysynda sipattalǵan.
Sarapshynyń aitýynsha, munyń bári jalpylama bas jaraqaty bolyp sanalady. Oǵan betindegi jaraqattar da, bas súiegindegi jaraqattar da jatady.
Sot meditsinasynda bul jaraqattardyń bári syrtqy áserdiń kesirinen bolǵan zaqymdaný retinde qarastyrylady.
Tahir Halimnazarovtyń sózinshe, ólimniń sebebin aitqan kezde osy jaraqattardyń bárin qarastyrý kerek. Olardyń árqaisyn bólek qarastyrýǵa bolmaidy.
Sarapshy qulaýdan alǵan jaraqattar bolmaǵanyn aitady. Al Bishimbaev Núkenova qabyrǵaǵa soǵylyp, artynsha ýnitazǵa qulap túskenin aitqan bolatyn.
Sonymen qatar, sot-meditsinalyq sarapshy Saltanat Núkenovanyń basyndaǵy sýbdýraldy gematomanyń mólsheri 230 gramm bolǵan. Bul ólimge ákeledi.
Tahir Halimnazarovtyń aitýynsha, Bishimbaev ony qolmen urdy ma, alaqanmen urdy ma - mańyzdy emes. Sebebi bul jaǵdaida urǵan adamnyń salmaǵy aitarlyqtai áser etetin kórinedi. Salmaǵy iri adam alaqanymen bolsa da aýyr jaraqattaýy múmkin.
Bul jaǵdaidan keiin Bishimbaevqa qatysty kezekti sot otyrysynda aiyptalýshynyń advokattary reseilik sot-meditsinalyq sarapshylarynyń Saltanattyń ólimine bailanysty shyǵarǵan sheshimin oqyǵan bolatyn.
Alaida sýdia Aijan Kúlbaeva Saltanat Núkenovanyń ólimine qatysty máskeýlik mamandar júrgizgen saraptama nátijesin is materialdaryna qosý týraly ótinishti qanaǵattandyrmady.
Sýdia qosymsha saraptama jasalatyny týraly sotqa, prokýrorlarǵa ýaqtyly habar berilmegenin jáne saraptama zańdy buza otyryp jasalǵanyn aitty.
16 sáýirde ótken sot otyrysynda Qýandyq Bishimbaevtyń advokattary reseilik mamandardyń saraptama nátijesin birneshe saǵat boiy oqyp shyqqan bolatyn. Saraptamada Saltanat Núkenovanyń ólimine ol qaiǵyly oqiǵa bolardan 3-4 apta buryn alǵan jaraqaty sebep bolǵanyn aitylǵan edi. Alaida bul saraptama qorytyndysy almatylyq mamandar jasaǵan saraptama nátijesine qaishy bolǵan.
Bishimbaevtyń qorǵaýshylary máskeýlik mamandarmen jeke sot meditsinalyq saraptama jasatqan bolatyn. Alaida olardyń bul bastamasy týraly quzyrly organdar beihabar bolǵan. Saraptama qorytyndysy jalǵan bolyp shyqqan jaǵdaida saraptama jasaǵan máskeýlik mamandardy jaýapqa tartý múmkin emes. Bul týraly prokýror aitqan bolatyn. Onyń bul pikirin jábirlenýshi tarap ta qoldaǵan edi.
