Ázerbaijan Respýblikasynyń memlekettik munai kompaniiasy Socar Túpqaraǵan aýdanynda ornalasqan Dońǵa ken ornyn igerý jobasyna qatysýǵa niet bildirdi. Bul týraly QR energetika vitse-ministri Sanjar Jarkeshov Report.az basylymyna aityp bergen, dep habarlaidy Dalanews.kz.
Sanjar Jarkeshovtyń aitýynsha, Qazaqstan men Ázerbaijannyń energetika ministrlikteri munai barlaý jáne óndirý salasyndaǵy áriptestikti nyǵaitý baǵytynda belsendi jumys júrgizip jatyr. Ulttyq kompaniialar – «QazMunaiGaz» jáne Socar – birlesken jobalardy iske asyrýdy kózdeitin yntymaqtastyq týraly memorandýmǵa qol qoiǵan.
«Atap aitqanda, Mańǵystaý oblysyndaǵy Dońǵa ken orny boiynsha Socar jobaǵa qatysýǵa niet bildirdi. Qazir belsendi kelissózder júrip jatyr, jáne biz Ázerbaijannyń energetika ministrliginen naqty nátijeler kútemiz. Óz kezeginde Qazaqstan jan-jaqty qoldaý kórsetýge daiyn», – dedi Sanjar Jarkeshov.
Dońǵa ken orny 1966 jyly ashylǵan. Onyń geologiialyq qory 106 million tonna munai men 6 milliard tekshe metrden astam gaz dep baǵalanady. Joba 1994 jyly Qazaqstan úkimetimen jasalǵan ónimdi bólý týraly kelisim aiasynda júzege asyrylyp keledi.
2023 jyly «QazMunaiGaz» ulttyq kompaniiasy frantsýzdyq TotalEnergies kontserninen jobadaǵy 60 paiyzdyq úlesti satyp alyp, operatordyń ataýyn Dunga Operating GmbH dep ózgertken.
Qazirgi ýaqytta jobanyń qatysýshylary:
- «QazMunaiGaz» – 60%;
- Oman Oil Company Limited – 20%;
- Partex Kazakhstan Corporation – 20%.
Ken ornyn igerýdiń operatory – Dunga Operating GmbH.
Aita keteiik, ashyq derekterge súiensek, Socar – Ázerbaijan Respýblikasynyń memlekettik munai kompaniiasy jáne álemdegi iri munai-gaz kompaniialarynyń biri. Kompaniia munai men gazdy barlaý, óndirý, óńdeý jáne tasymaldaýmen, sondai-aq munai ónimderin ótkizýmen ainalysady. Ol aimaqtyń energetikalyq naryǵyndaǵy negizgi oiynshylardyń biri sanalady jáne álemniń kóptegen elinde ókildikteri bar.
Ázerbaijandaǵy munaidyń 80 paiyzyn, al tabiǵi gazdyń 100 paiyz tasymalyn Socar qamtamasyz etedi. Kompaniianyń Grýziia, Túrkiia, Ýkraina jáne basqa da elderde enshiles kásiporyndary men ókildikteri bar, olar munai ónimderin óndirý, tasymaldaý jáne satý baǵytynda jumys isteidi.
