Qaraǵandyda polıseıler jasandy ıntellekti bar kameralardy qoldana bastaǵan, dep habarlaıdy Dalanews.kz.

Polısıa qyzmetkerleri qoǵamdyq qaýipsizdikti qamtamasyz etip, oqıǵalarǵa jedel áreket etýge múmkindik beretin ıntellektýaldy beıneanalıtıka júıesin paıdalana bastaǵan. Búginde Qaraǵandy qalasynda jasandy ıntellekt elementteri bar 60 kamera jumys isteıdi.

Olar adamdar kóp jınalatyn oryndarǵa – aıaldamalarǵa, "Saryarqa" áýejaıyna jáne temirjol vokzaldaryna ornatylǵan. Júıe azamattardyń júzin tanyp, agressıvti minez-qulyqty, adamdardyń shamadan tys jınalýyn jáne ózge de kúmándi jaǵdaılardy avtomatty túrde tirkeıdi. Qajet bolǵan sátte kameralar jedel qyzmetterge birden dabyl jiberedi.

"Jyl basynan beri beıneanalıtıka júıesiniń kómegimen 49 quqyq buzýshy anyqtalyp, ustaldy", - dedi Qaraǵandy oblysy polısıa departamentiniń bastyǵy Negmet Ismagýlov.

Máselen, vokzal aýmaǵyndaǵy kamera probasıalyq baqylaýda júrgen jáne sot sheshimine qaramastan Pavlodar oblysynan ketip qalǵan er adamdy anyqtaǵan. Al taǵy bir jaǵdaıda – alıment tóleýden jaltaryp júrgen Qostanaı oblysynyń turǵyny ustaldy. Polısıa departamentiniń baspasóz qyzmeti atap ótkendeı, jasandy ıntellekt elementteri bar tehnologıalardy paıdalaný profılaktıkalyq jumystyń tıimdiligin arttyryp, óńir turǵyndarynyń qaýipsizdigin kúsheıtti.