Eki jyl buryn Ulttyq ulannyń 6636 áskeri bóliminde boryshyn ótegen 21 jastaǵy Qaisar Sultanov jumbaq jaǵdaida kóz jumǵan edi. Resmi nusqada onyń óz-ózine qol jumsaǵany aitylǵan. Alaida marqumnyń anasy Sáýle Tileýbergenova bul málimetke senbeidi, dep habarlaidy Dalanews.kz.
“Qaisar ómirge qushtar, kóńildi jigit edi. Áskerge óz erkimen bardy. Ólerinen bir kún buryn demalysqa surap alyp shyqtym, kóńildi boldy. Eshqandai belgi bolǵan joq. Al kelesi kúni onyń denesin kórsetti. Tergeýshiler bunyń sýitsid ekenin aitty. Biraq dálel joq. Is úsh ret jabyldy. Men úndemei otyra almadym”, – deidi Sáýle Tileýbergenova.
Marqumnyń anasy óz betinshe táýelsiz saraptama taǵaiyndaǵan. Aitýynsha, alǵashqy oqtan keiin Qaisardyń tiri qalýy múmkin emes. Biraq resmi materialdarda onyń alty minýttan soń taǵy bir ret oq atqany jazylǵan.
“Beinejazbalar joiylǵan. Saraptama diskige ózgeris engizilgenin dáleldedi. Bul aiǵaqtardy ádeii óshirgen. Ulym bir nársege kýá bolǵan siiaqty. Sol úshin onyń únin óshirdi”, – deidi anasy.
Onyń sózin otbasynyń zańgeri Inga Imanbai da rastady.
“Qaisardyń isi qaita qaralýy tiis. Adam óz basynan eki ret ata almaidy. Bul – aiqyn kisi óltirý. Tek kinálini emes, dálelderdi joiǵandardy da tabý kerek. Qaisardyń qany súrtildi, beinejazbalar óshirildi. Bul – naǵyz qylmysty jasyrý áreketi”, – deidi ol.
Qazir is qaita qozǵalyp, tergeý amaldary júrip jatyr. Biraq anasy istiń taǵy jabylyp qalýynan qaýiptenedi.
“Bizdiń elimizde ádildik izdeý tym qiyn. Eger áskerge ministrler men sheneýnikterdiń balalary barsa, mundai jaǵdai bolmas edi. Men shyndyq ashylǵansha tynbaimyn”, – deidi Sáýle Tileýbergenova.
Eske salaiyq, Qaisar Sultanov 2023 jyldyń qazan aiynda 6636 áskeri bóliminde boryshyn ótep júrgende qaza tapqan. Ol Qaraǵandydaǵy ýniversitetti bitirip, zańger bolýdy armandaǵan.
Bilik 9 qazan kúni 6636 áskeri bóliminiń sarbazy, qatardaǵy jaýynger Qaisar Sultanovtyń áskeri qalashyqty kúzetý kezinde túngi ýaqytta óz beketinde basynan oq jaraqatyn alǵan kúiinde tabylǵanyn habarlaǵan bolatyn.
