Súiek sorpa – adamzat tarihyndaǵy eń kóne ári paidaly taǵamdardyń biri. Ol tek as máziriniń bóligi emes, kóptegen halyqtardyń dástúrli meditsinasynyń mańyzdy elementi bolyp sanalady. Búginde salaýatty ómir saltyn ustanatyndar men durys tamaqtanýdy qolǵa alǵan adamdar arasynda súiek sorpa qaitadan tanymal bola bastady, dep habarlaidy Dalanews.kz.
Súiek sorpasynyń paidasy
Súiek sorpasy tabiǵi kollagenge, aminqyshqyldarǵa, dárýmender men mineraldarǵa bai. Onyń quramynda kaltsii, fosfor, magnii, temir, tsink jáne selen sekildi aǵzaǵa qajetti elementter mol.
Kollagen – bizdiń súiek, teri, shash, tyrnaq pen býyndarymyzdyń negizgi qurylys materialy. Ol jaranyń jazylýyn tezdetedi, teriniń serpindiligin arttyrady, shashtyń ósýine yqpal etedi, býyndardyń qozǵalysyn jeńildetedi.
Ǵylymi zertteýlerge sáikes, súiek sorpasyn turaqty tutyný zat almasýdy jaqsartady jáne bulshyqet massasyn saqtaýǵa kómektesedi.
Ol immýnitetpen pen asqazanǵa paidaly
Súiek sorpasynyń taǵy bir artyqshylyǵy — asqazan-ishek joldarynyń saýlyǵyna oń áseri. Ondaǵy glitsin men prolin siiaqty aminqyshqyldar qabynýdy azaitady, ishek qabyrǵasyn qalpyna keltiredi jáne immýndyq júieni nyǵaitady.
Sondai-aq, ol JRVI jáne taǵamnan ýlaný kezinde aǵzany tez qalpyna keltirýge kómektesedi, óitkeni ol aǵzadaǵy suiyqtyq pen aqýyz tapshylyǵyn tiimdi óteidi.
Ol býyndar men súiekterge paidaly
Sorpadaǵy kollagen men jelatin býyndardyń qozǵalysyn jaqsartady, artrit pen revmatizmniń belgilerin jeńildetedi. Bul ásirese egde jastaǵylar men belsendi ómir saltyn ustanatyndar úshin paidaly.
Ol terige paidaly
Bir qyzyǵy, súiek sorpasy – tabiǵi “sulýlyq sýsyny”. Onyń quramyndaǵy kollagen teriniń tegis ári serpindi bolýyna kómektesedi, ájimderdiń paida bolýyn baiaýlatady. Sondai-aq, tyrnaqtardy qataityp, shashty qalyń ári jyltyr etedi.
Súiek sorpasyn qalai durys daiyndaý kerek?
Naǵyz paidaly sorpa alý úshin eń bastysy – sapaly súiekter tańdaý.
-
1 kg súiekke 3–4 litr sý quiyp, baiaý otta kem degende 6–12 saǵat qainatady.
-
Qainaý kezinde azdap limon shyryny nemese sirke sýyn qossa, súiektegi mineraldar jaqsy bólinedi.
-
Tátti dám men hosh iis úshin sábiz, piiaz, baldyrkók, lavr japyraǵy, sarymsaq qosýǵa bolady.
-
Daiyn sorpany súzip, salqyndatqan soń tońazytqyshta 3 kúnge deiin, al muzdatqyshta 3–4 aiǵa deiin saqtaýǵa bolady.
Súiek sorpasyn tańerteń ashqarynǵa ishseńiz, ol as qorytý júiesin oiatyp, energiia beredi. Sondai-aq, kúndizgi nemese keshki asqa da jaraidy. Keibireýler ony kókónistermen, jumyrtqamen tolyqtyryp ishedi.
