Qazaqstanda keiingi 10 jylda neke sany shamamen 22 paiyzǵa azaiǵan. Bul týraly 15 mamyr - Halyqaralyq otbasy kúnine orai Ulttyq statistika biýrosy jariialaǵan málimette aitylǵan, dep habarlaidy dalanews.kz.
Resmi derekke sáikes 2015 jyly elde 148,8 myń neke tirkelse, 2025 jyly bul kórsetkish 116 myńǵa deiin tómendegen. Sonymen qatar, nekelesý koeffitsienti de azaiǵan. Máselen, 2015 jyly ár 1000 adamǵa shaqqanda 8,48 neke tirkelse, 2025 jyly bul kórsetkish 5,69 bolǵan.
Óńirler arasynda eń joǵary nekelesý koeffitsienti Astanada baiqalǵan: 1000 adamǵa 6,75 neke. Al eń tómen kórsetkish Qyzylorda oblysynda: 5,06. Batys Qazaqstan oblysynda bul kórsetkish 5,1 bolǵan.
Statistikaǵa súiensek, eldegi nekelesý deńgeiiniń eń joǵary kezeńi 2012-2013 jyldarǵa sáikes keledi. Ol ýaqytta ár 1000 adamǵa shaqqanda 9,8-9,9 neke tirkelgen.
Mamandar mundai ózgeriske birneshe faktor áser etkenin aitady. Sonyń biri - demografiialyq tolqyn. Iaǵni 1990 jyldardyń sońynda týý kórsetkishi tómen bolǵan kezeńde dúniege kelgen býyn qazir otbasy quratyn jasqa jetken. Budan bólek, jastar arasynda nekege kesh turý úrdisi de baiqalady. Keiingi 10 jylda alǵashqy nekege turýdyń ortasha jasy erlerde 27,9 jasqa, áielderde 25,3 jasqa deiin ulǵaiǵan.
