Qazaqstanda kommýnaldyq jelilerdi jańǵyrtýǵa 1,4 trln teńgege jýyq 520 joba tirkeldi, dep habarlaidy dalanews.kz.
Premer ministrdiń orynbasary Qanat Bozymbaev Energetika jáne kommýnaldyq sektordy jańǵyrtý jónindegi ulttyq jobanyń júzege asyrylý barysyn, jobalardy qarjylandyrý máselelerin, otandyq taýar óndirýshiler ónimderin qoldaný deńgeiin, sondai-aq turǵyn úi kómegin proaktivti formatta kórsetý jumystaryn tekserdi.
Ulttyq jobanyń elektrondyq platformasynda jalpy quny shamamen 1,4 trln teńgeni quraityn 520 joba tirkelgen. Onyń ishinde 554 mlrd teńge somasyndaǵy 244 joba satyp alý rásimderiniń túrli kezeńderinde tur.
Ulttyq ekonomika ministrliginiń málimetinshe, pilottyq jobalardy eskere otyryp, jalpy quny 371 mlrd teńgeden asatyn 127 joba boiynsha konkýrstyq rásimder aiaqtalǵan. Qazirgi ýaqytta jobalaý jáne qurylys montaj jumystary júrgizilýde.
Nátijesinde biyl «qyzyl aimaqtaǵy» nysandar sanyn, sondai aq injenerlik jelilerdiń syni tozý deńgeiin tómendetý kútilýde.
Jylýmen jabdyqtaý salasynda Pavlodar, Soltústik Qazaqstan, Mańǵystaý, Qaraǵandy jáne Aqmola oblystaryndaǵy jaǵdaidy jaqsartý josparlanǵan.
Elektrmen jabdyqtaý salasynda Jambyl, Batys Qazaqstan, Soltústik Qazaqstan, Qaraǵandy oblystarynda, Abai oblysy men Almaty qalasynda jumystar júrgiziledi.
Sýmen jabdyqtaý salasynda Jetisý, Túrkistan, Almaty, Jambyl jáne Qaraǵandy oblystaryndaǵy máselelerdi sheshý kózdelgen.
Al sý burý salasynda Jetisý, Qaraǵandy, Batys Qazaqstan, Almaty, Túrkistan jáne Aqtóbe oblystarynda, sondai aq Shymkent qalasynda jańǵyrtý jumystary júrgiziledi.
Qanat Bozymbaev ákimdikterge Ónerkásip jáne qurylys ministrligimen, Ulttyq ekonomika ministrligimen jáne «QazOrtalyq TKSh» AQ men birlesip jobalardy júzege asyrý qarqynyn jedeldetýdi jáne óńirlerde jóndeý jumystaryna dereý kirisýdi tapsyrdy.
Sondai aq 2026 jylǵy 1 maýsymǵa deiin EKSJ elektrondyq platformasy arqyly 2027 jylǵa arnalǵan barlyq jobalar boiynsha ótinimderdi engizýdi qamtamasyz etý tapsyryldy.
Vitse premer EKSJ aiasyndaǵy jobalardyń eleýli bóligi kvazimemlekettik jáne jekemenshik sektordyń iri kompaniialaryna tiesili ekenin atap ótti.
Osyǵan bailanysty «Báiterek» holdingine Ulttyq ekonomika ministrligimen birlesip ekinshi deńgeili bankter men halyqaralyq qarjy uiymdary arqyly qarjy tartatyn jeke kompaniialardy súiemeldeýdi kúsheitý tapsyryldy.
Budan bólek, vitse premer Biryńǵai jinaqtaýshy zeinetaqy qorynyń qarajatyn tartý máselesin pysyqtap, 2026 jylǵy 1 maýsymǵa deiin Úkimet apparatyna usynystar engizýdi tapsyrdy.
Otyrysta EKSJ jobalary sheńberindegi satyp alý rásimderiniń júieli máseleleri men otandyq taýar óndirýshilerge basymdyq berý máselesine erekshe nazar aýdaryldy.
Ónerkásip jáne qurylys ministrligine «QazOrtalyq TKSh» AQ jáne Tabiǵi monopoliialardy retteý komitetimen birlesip bir apta ishinde barlyq jobalarǵa taldaý júrgizip, qazaqstandyq óndiris taýarlaryn barynsha paidalanýdy qamtamasyz etý tapsyryldy.
Sonymen qatar tabiǵi monopoliia sýbektileri men EPC merdigerler tarapynan otandyq óndirýshiler ónimderin satyp alý boiynsha turaqty monitoring júrgizý júkteldi.
«Biz qazaqstandyq taýarlardy jobalaý kezeńinen bastap qoldanýdy qamtamasyz etýimiz qajet. Sonymen qatar ónimdi qajetti kólemde, sapada jáne merziminde jetkizý máseleleri boiynsha otandyq óndirýshilermen ózara is qimyldy jolǵa qoiý mańyzdy», — dedi Qanat Bozymbaev.
Kún tártibindegi taǵy bir mańyzdy másele BJO operatorlarymen integratsiialaý arqyly turǵyn úi kómegin esepteý men taǵaiyndaý úderisterin avtomattandyrý boldy.
Eńbek jáne halyqty áleýmettik qorǵaý ministrligi tarapynan servisterdiń tolyq tehnikalyq jáne uiymdastyrýshylyq daiyndyǵy qamtamasyz etilgeni atap ótildi.
Ónerkásip jáne qurylys ministrligi aqparattyq qaýipsizdik talaptaryna sáikestik attestatynan ótken 12 BEAO operatoryn «Áleýmettik kómek» aqparattyq júiesimen integratsiialaý jumystaryn júrgizýde.
Otyrys qorytyndysy boiynsha Qanat Bozymbaev Eńbek jáne halyqty áleýmettik qorǵaý ministrligine Ónerkásip jáne qurylys ministrligimen jáne ákimdiktermen birlesip 2026 jylǵy 1 shildege deiin BJO men tolyq integratsiiany aiaqtaýdy tapsyrdy.
