Genderlik máseleler boiynsha belgili qazaqstandyq sarapshy Áigerim Qusaiynqyzy EQYU alańynda sóilegen sózinde Qazaqstannyń adam quqyqtaryn qorǵaý jáne genderlik saiasat baǵytyndaǵy jetistikterine toqtaldy, dep habarlaidy Dalanews.kz.
Sarapshynyń aitýynsha, Eýropadaǵy qaýipsizdik jáne yntymaqtastyq uiymyna (EQYU) múshe 56 memlekettiń ishinde Qazaqstan adam quqyqtaryn qorǵaý baǵytynda belsendi elderdiń qatarynda.
«2010 jyly Astanada ótken sammit Qazaqstannyń EQYU-ǵa qosylýyndaǵy mańyzdy kezeńderdiń biri boldy. Sebebi bul uiymǵa múshe bolý – eldegi adam quqyqtarynyń saqtalý deńgeiin, azamattyq qoǵam men memlekettiń ózara is-qimylyn kórsetedi», – dedi ol.
Áigerim Qusaiynqyzynyń aitýynsha, EQYU sammitteri tek memleket ókilderi ǵana emes, azamattyq qoǵam men ǵalymdardyń da pikirin eskeretin úshtaǵan formatta ótedi.
«Bul – adam quqyqtary, genderlik teńdik jáne qaýipsizdik salasyndaǵy eń mańyzdy halyqaralyq dialog alańy», – dep atap ótti sarapshy.
Sondai-aq ol Qazaqstannyń bala quqyqtaryn qorǵaý jáne turmystyq zorlyq-zombylyqpen kúres baǵytynda naqty qadamdar jasap otyrǵanyn aitty.
«Prezidentimiz aitqandai, árbir bala Qazaqstanda baqytty balalyq shaqqa laiyq. Bul tek sóz júzinde emes, zańnamalyq deńgeide júzege asyp otyr. Máselen, byltyr qabyldanǵan “Saltanat zańy” tek turmystyq zorlyq-zombylyq emes, balaǵa qarsy jasalatyn quqyqbuzýshylyqtardyń da aldyn alýǵa baǵyttalǵan», – dedi ol.
Sarapshynyń aitýynsha, stalking pen qyz alyp qashýdy qylmystyq kodekske engizý – Qazaqstannyń adam quqyqtaryn qorǵaý salasyndaǵy erekshe bastamasy.
«Bul baptar qazirdiń ózinde kóptegen damyǵan Eýropa elderiniń zańnamasynda joq. Sondyqtan Qazaqstannyń bul tájiribesi halyqaralyq deńgeide joǵary baǵalandy», – dedi Áigerim Qusaiynqyzy.
Ol sonymen qatar azamattyq qoǵam men ǵylymi qaýymdastyqtyń memlekettik saiasatty jetildirýge belsendi atsalysyp otyrǵanyn atap ótti.
«Bizde qabyldanatyn kez kelgen sheshim qoǵam ókilderiniń únin eskerip jasalady. Bul – qazaqstandyq demokratiialyq tájiribeniń mańyzdy ereksheligi», – dedi sarapshy.
EQYU otyrysynda Qazaqstannyń genderlik teńdik pen adam quqyqtaryn qorǵaý salasyndaǵy zańnamalyq bastamalary oń baǵalanyp, eldiń ozyq tájiribesi halyqaralyq qaýymdastyq tarapynan qoldaý tapty.
