گەندەرلىك ماسەلەلەر بويىنشا بەلگىلى قازاقستاندىق ساراپشى ايگەرىم قۇسايىن قىزى ەقىۇ الاڭىندا سويلەگەن سوزىندە قازاقستاننىڭ ادام قۇقىقتارىن قورعاۋ جانە گەندەرلىك ساياسات باعىتىنداعى جەتىستىكتەرىنە توقتالدى، دەپ حابارلايدى Dalanews.kz.
ساراپشىنىڭ ايتۋىنشا، ەۋروپاداعى قاۋىپسىزدىك جانە ىنتىماقتاستىق ۇيىمىنا (ەقىۇ) مۇشە 56 مەملەكەتتىڭ ىشىندە قازاقستان ادام قۇقىقتارىن قورعاۋ باعىتىندا بەلسەندى ەلدەردىڭ قاتارىندا.
«2010 جىلى استانادا وتكەن سامميت قازاقستاننىڭ ەقىۇ-عا قوسىلۋىنداعى ماڭىزدى كەزەڭدەردىڭ ءبىرى بولدى. سەبەبى بۇل ۇيىمعا مۇشە بولۋ – ەلدەگى ادام قۇقىقتارىنىڭ ساقتالۋ دەڭگەيىن، ازاماتتىق قوعام مەن مەملەكەتتىڭ ءوزارا ءىس-قيمىلىن كورسەتەدى»، – دەدى ول.
ايگەرىم قۇسايىن قىزىنىڭ ايتۋىنشا، ەقىۇ سامميتتەرى تەك مەملەكەت وكىلدەرى عانا ەمەس، ازاماتتىق قوعام مەن عالىمداردىڭ دا پىكىرىن ەسكەرەتىن ءۇشتاعان فورماتتا وتەدى.
«بۇل – ادام قۇقىقتارى، گەندەرلىك تەڭدىك جانە قاۋىپسىزدىك سالاسىنداعى ەڭ ماڭىزدى حالىقارالىق ديالوگ الاڭى»، – دەپ اتاپ ءوتتى ساراپشى.
سونداي-اق ول قازاقستاننىڭ بالا قۇقىقتارىن قورعاۋ جانە تۇرمىستىق زورلىق-زومبىلىقپەن كۇرەس باعىتىندا ناقتى قادامدار جاساپ وتىرعانىن ايتتى.
«پرەزيدەنتىمىز ايتقانداي، ءاربىر بالا قازاقستاندا باقىتتى بالالىق شاققا لايىق. بۇل تەك ءسوز جۇزىندە ەمەس، زاڭنامالىق دەڭگەيدە جۇزەگە اسىپ وتىر. ماسەلەن، بىلتىر قابىلدانعان “سالتانات زاڭى” تەك تۇرمىستىق زورلىق-زومبىلىق ەمەس، بالاعا قارسى جاسالاتىن قۇقىقبۇزۋشىلىقتاردىڭ دا الدىن الۋعا باعىتتالعان»، – دەدى ول.
ساراپشىنىڭ ايتۋىنشا، ستالكينگ پەن قىز الىپ قاشۋدى قىلمىستىق كودەكسكە ەنگىزۋ – قازاقستاننىڭ ادام قۇقىقتارىن قورعاۋ سالاسىنداعى ەرەكشە باستاماسى.
«بۇل باپتار ءقازىردىڭ وزىندە كوپتەگەن دامىعان ەۋروپا ەلدەرىنىڭ زاڭناماسىندا جوق. سوندىقتان قازاقستاننىڭ بۇل تاجىريبەسى حالىقارالىق دەڭگەيدە جوعارى باعالاندى»، – دەدى ايگەرىم قۇسايىن قىزى.
ول سونىمەن قاتار ازاماتتىق قوعام مەن عىلىمي قاۋىمداستىقتىڭ مەملەكەتتىك ساياساتتى جەتىلدىرۋگە بەلسەندى اتسالىسىپ وتىرعانىن اتاپ ءوتتى.
«بىزدە قابىلداناتىن كەز كەلگەن شەشىم قوعام وكىلدەرىنىڭ ءۇنىن ەسكەرىپ جاسالادى. بۇل – قازاقستاندىق دەموكراتيالىق تاجىريبەنىڭ ماڭىزدى ەرەكشەلىگى»، – دەدى ساراپشى.
ەقىۇ وتىرىسىندا قازاقستاننىڭ گەندەرلىك تەڭدىك پەن ادام قۇقىقتارىن قورعاۋ سالاسىنداعى زاڭنامالىق باستامالارى وڭ باعالانىپ، ەلدىڭ وزىق تاجىريبەسى حالىقارالىق قاۋىمداستىق تاراپىنان قولداۋ تاپتى.
