Memleket basshysy «Qazaqstan Respýblikasynyń keibir zańnamalyq aktilerine densaýlyq saqtaý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy.
Bul - mańyzdy zań! Biz keleshek kelbeti sanalatyn jas urpaqtyń densaýlyǵyn oilaýymyz kerek.
Zań meditsina qyzmetkerlerin quqyqtyq jáne qarjylyq turǵydan qorǵaý júiesin engizýge jáne olardyń jaýapkershiligin arttyrýǵa, sondai-aq jastar arasynda quramynda nikotini bar zattardyń taralýynyń aldyn alý jáne oǵan qarsy kúresý úshin júieli sharalar qabyldaýǵa baǵyttalǵan.
Dárigerlerge memleket tarapynan birqatar jaqsy jaǵdailar jasalyp jatyr.
Zań arqyly meditsina qyzmetkerleriniń kásibi jaýapkershiligin saqtandyrý tetigi engizildi (Zań resmi jariialanǵannan keiin 6 ai ótken soń qoldanysqa enedi).
Sonymen qatar meditsina qyzmetkerlerin qoldaýǵa baǵyttalǵan túzetýler qabyldandy. Atap aitqanda:
- turǵylyqty jeri boiynsha mektepke deiingi uiymdardan balalary úshin basym tártippen oryn alý, kásibi qyzmetine zańsyz aralasýdan jáne kedergi keltirýden qorǵaý, mamandyǵyna qurmetpen qaraý, meditsinalyq mamandyǵy boiynsha áskeri qyzmetin ótkerý nemese áskeri qyzmetke shaqyrýdy keiinge qaldyrý quqyqtary berildi;
✔️«Qazaqstannyń eńbek sińirgen dárigeri» qurmetti ataǵy – memlekettik nagradasy belgilendi;
✔️basy artyq esep nemese aqparat berýden bosatý úshin densaýlyq saqtaý salasyndaǵy ýákiletti organ budan bylai meditsina qyzmetkerleri toltyrýǵa mindetti qujattama tizbesin bekitedi;
✔️asa tapshy mamandyqty meńgergen meditsina qyzmetkerleri aýyldyq jerge keminde 5 jyl jumys isteýge kelgen jaǵdaida, oǵan eń tómengi jalaqynyń 100 eselengen mólsherinde birrettik aqshalai tólem beriledi.
Budan bólek, Zańda shegýge kelmeitin temeki ónimderin, veipterdi, hosh iistendirgishterdi jáne olarǵa arnalǵan suiyqtyqtardy satýǵa, taratýǵa, sondai-aq olardy jarnamalaýǵa tyiym salý qarastyrylǵan (Bul norma resmi jariialanǵannan keiin 60 kún ótken soń qoldanysqa engiziledi).
Memleket basshysynyń tapsyrmasyna sáikes ázirlenip, Parlament depýtattarynyń qyzý talqylaýynan ótken zań ómirsheń bolsyn dep tileiik!
Nurtóre JÚSIP, QR Parlamenti Senatynyń depýtaty
