Energetika ministriniń burynǵy keńesshisi, sarapshy Oljas Baidildinov keiingi ýaqytta daýly málimdemelerimen jurttyń synyna ushyrap júr. Buǵan deiin ol qoǵamdyq kólikterdegi jolaqysy 500 teńge bolýy tiis dep pikir bildirip, kópshiliktiń narazylyǵyn týdyrǵan edi. Araǵa uzaq ýaqyt salmai, “Qazaqstan antireseilik baǵytqa bet aldy” degen málimdemesimen taǵy da qoǵamnyń ashýyna tidi. Osy pikirlerinen keiin kópshilik sarapshynyń ómirine nazar aýdara bastady. Dalanews.kz redaktsiiasy Oljas Baidildinovtiń qyzmettik jáne jeke ómirine qatysty ashyq derekterdi saralap kórdi.
Qymbat brend kiimderi
Threads qoldanýshylary eń aldymen Baidildinovtiń áleýmettik jelidegi sýretterin talqyǵa saldy. Onda sarapshy álemdik sán úileriniń qymbat kiimderin kiip túsken. Tipti olardyń baǵasyn da ashyq kórsetken.
Máselen, onyń ústindegi Gucci kúrteshesiniń quny - 3,2 million teńge, al Louis Vuitton jeidesi - 556 myń teńge turady.
Jeke múlikteri
Dalanews.kz 2022 jyly jariialanǵan ashyq derekterge súiene otyryp, Baidildinovtiń sol kezdegi múliktik jaǵdaiyna da sholý jasady. @chinovnik_kz Telegram-arnasynyń málimetinshe, sarapshynyń menshiginde mynadai nysandar bolǵan:
• Qosshy qalasynda eki qabatty úi (2020 jyly salynǵan, 288 sharshy metr) – shamamen 85 mln teńge;
• Astanadaǵy Highvill Astana turǵyn úi kesheninen 3 bólmeli páter (100 sharshy metr) – 60 mln teńge;
• Altyn-Arna turǵyn úi kesheninen 2 bólmeli páter (75 sharshy metr) – 40 mln teńge;
• Frantsýz kvartaly turǵyn úi kesheninen 1 bólmeli páter (37 sharshy metr) – 27 mln teńge;
• Kommertsiialyq nysan (100 sharshy metr) – 20 mln teńge;
• 2021 jylǵy eki avtokólik – jalpy quny 33 mln teńge shamasynda.
Osylaisha, 2022 jylǵy esep boiynsha, Baidildinovtiń jeke aktivteriniń jalpy quny 250 million teńgeden asqan.
Buǵan qosa, ol 2024 jyly Ystambuldan úsh bólmeli páter satyp alyp, ony óziniń YouTube arnasynda maqtanyshpen kórsetken.
Baidildinovtyń daýly málimdemeleri
Gaz baǵasy
Eske salsaq, 2022 jyly Qandy qańtar oqiǵasy qarsańynda sarapshy Oljas Baidildinov suiytylǵan gaz baǵasynyń qymbattaýyna bailanysty el arasynda pikirtalas týdyrǵan edi. Ol kezde Baidildinov “gaz baǵasynyń 15–20 teńgege ósýi aitarlyqtai shyǵyn emes, biz internetke de odan kóp tóleimiz” dep málimdep, halyqty “qoǵamdyq kólikke kóshýge” shaqyrǵan.
Bul pikir kópshiliktiń narazylyǵyn týǵyzdy. Áleýmettik jeli qoldanýshylary Qańtar oqiǵasy kezinde taraǵan qarýly adamdardyń júk kóliginde júrgen kadrlarymen osy sózderdi bailanystyryp, qaita eske aldy.
Jolaqyny 500 teńgege kóterý usynysy
Al jaqynda Baidildinov tasymaldaýshylar shyǵynmen jumys istep jatqanyn aityp, avtobýs bileti kem degende 500 teńge bolýy tiis degen pikir bildirgen edi.
Onyń aitýynsha, Petropavlda tasymaldaýshylarǵa sýbsidiia úsh jyldan beri tólenbei keledi, al jolaqynyń ózin-ózi aqtaityn quny keminde 345 teńge bolýy tiis.
"Men bul máseleni burynnan aityp kelemin. Avtoparkterge bólinetin sýbsidiialar júiesi tumandy, jemqorlyqqa beiim, ári sapa turǵysynan eshqandai nátije bermeidi", — deidi sarapshy.
Onyń pikirinshe, Astana men Almatyda qoǵamdyq kólik jolaqysy 500 teńge shamasynda bolýy tiis. Buǵan deiin máslihat sessiialarynda 450 teńge kólemindegi ózindik qun da atalǵan.
"Mysaly, byltyr Almatyda avtobýs tasymalyna 200 million dollar sýbsidiia bólindi. Biraq odan sapa jaqsardy ma?" – deidi ol.
Sarapshy bul salaǵa naryqtyq baǵa men ashyq básekelestik engizý qajet ekenin aitady.
"Úsh aialdama júrgen adam men bir jarym saǵat jol júrgen jolaýshynyń birdei tóleýi ekonomikalyq turǵydan qisynsyz. Jolaqy qashyqtyqqa qarai eseptelýi kerek", - dep qosty Baidildinov.
Til máselesi
Keiin Baidildinov Qazaqstandaǵy tildik jaǵdai men aimaq elderindegi jastardyń orys tilin bilmeý máselesine toqtalǵan edi. Onyń aitýynsha, bul qubylys Resei úshin de mańyzdy áleýmettik ári ideologiialyq faktorǵa ainalyp keledi.
"Qazir qazaq tilinde oqytylatyn synyptar – 70 paiyz, al orys tilinde oqytylatyn synyptar – shamamen 30 paiyz ǵana. Iaǵni, oqytý júiesinde qazaq tiliniń basymdyǵy aiqyn. Burynǵydai Resei óz mektepterin ashý kerek pe degen suraq týyndaidy, biraq bul qadam el ishinde qarsylyq týdyrýy múmkin", – dedi Baidildinov.
Sonymen qatar ol Ortalyq Aziia elderindegi jastardyń kópshiligi orys tilin bilmeitinin, bul jaǵdai Reseige migratsiialyq turǵydan da áser etip jatqanyn aitty.
"Qazaqstannyń ońtústiginen ári qaraiǵy elderde jastar oryssha sóilemeidi. Bul Resei úshin de másele – migranttardyń sapasy tómendep barady. Munyń áserin biz aldaǵy jyldary anyq baiqaimyz", – deidi sarapshy.
Baidildinov jeke tájiribesin mysalǵa keltirdi.
"Byltyr Qytaiǵa ushtym, "Almaty–Úrimji" reisimen. Sol reiste Qytaiǵa baǵyt alǵan túrli eldiń azamattary boldy. Shekarada kórgenim – jastar oryssha da, qytaisha da sóilei almaidy. Olar onlain-aýdarmashy arqyly túsinisip tur. Al qytai shekarashylary kerisinshe, erkin oryssha sóileidi. Mundaidy kórip tańǵalasyń", – dedi ol.
Sarapshynyń bul sózine ánshi Dimash Qudaibergen ótkir jaýap berdi.
"Biz, qazaqtar, álemniń barlyq tilin qurmetteimiz. Biraq qurmet ózińnen bastalady. Óz tilinen ózgeniń maquldaýy úshin uialǵan adam sózin emes, tamyryn joǵaltady. Oljas, sen siiaqty arandatýshyny jumystan shyǵarady dep úmittenemin, óitkeni sen qorqaq kishkentai bala sekildisiń. Qazaqsha jazbadym, óitkeni sen qazaq tilin bilmeisiń", - deidi Dimash.
