ەنەرگەتيكا ءمينيسترىنىڭ بۇرىنعى كەڭەسشىسى، ساراپشى ولجاس ءبايدىلدينوۆ كەيىنگى ۋاقىتتا داۋلى مالىمدەمەلەرىمەن جۇرتتىڭ سىنىنا ۇشىراپ ءجۇر. بۇعان دەيىن ول قوعامدىق كولىكتەردەگى جولاقىسى 500 تەڭگە بولۋى ءتيىس دەپ پىكىر ءبىلدىرىپ، كوپشىلىكتىڭ نارازىلىعىن تۋدىرعان ەدى. اراعا ۇزاق ۋاقىت سالماي، “قازاقستان انتيرەسەيلىك باعىتقا بەت الدى” دەگەن مالىمدەمەسىمەن تاعى دا قوعامنىڭ اشۋىنا ءتيدى. وسى پىكىرلەرىنەن كەيىن كوپشىلىك ساراپشىنىڭ ومىرىنە نازار اۋدارا باستادى. Dalanews.kz رەداكسياسى ولجاس ءبايدىلدينوۆتىڭ قىزمەتتىك جانە جەكە ومىرىنە قاتىستى اشىق دەرەكتەردى سارالاپ كوردى.
قىمبات برەند كيىمدەرى
Threads قولدانۋشىلارى ەڭ الدىمەن ءبايدىلدينوۆتىڭ الەۋمەتتىك جەلىدەگى سۋرەتتەرىن تالقىعا سالدى. وندا ساراپشى الەمدىك ءسان ۇيلەرىنىڭ قىمبات كيىمدەرىن كيىپ تۇسكەن. ءتىپتى ولاردىڭ باعاسىن دا اشىق كورسەتكەن.
ماسەلەن، ونىڭ ۇستىندەگى Gucci كۇرتەشەسىنىڭ قۇنى - 3،2 ميلليون تەڭگە، ال Louis Vuitton جەيدەسى - 556 مىڭ تەڭگە تۇرادى.
جەكە مۇلىكتەرى
Dalanews.kz 2022 جىلى جاريالانعان اشىق دەرەكتەرگە سۇيەنە وتىرىپ، ءبايدىلدينوۆتىڭ سول كەزدەگى مۇلىكتىك جاعدايىنا دا شولۋ جاسادى. @chinovnik_kz Telegram-ارناسىنىڭ مالىمەتىنشە، ساراپشىنىڭ مەنشىگىندە مىناداي نىساندار بولعان:
• قوسشى قالاسىندا ەكى قاباتتى ءۇي (2020 جىلى سالىنعان، 288 شارشى مەتر) – شامامەن 85 ملن تەڭگە؛
• استاناداعى Highvill Astana تۇرعىن ءۇي كەشەنىنەن 3 بولمەلى پاتەر (100 شارشى مەتر) – 60 ملن تەڭگە؛
• التىن-ارنا تۇرعىن ءۇي كەشەنىنەن 2 بولمەلى پاتەر (75 شارشى مەتر) – 40 ملن تەڭگە؛
• فرانسۋز كۆارتالى تۇرعىن ءۇي كەشەنىنەن 1 بولمەلى پاتەر (37 شارشى مەتر) – 27 ملن تەڭگە؛
• كوممەرسيالىق نىسان (100 شارشى مەتر) – 20 ملن تەڭگە؛
• 2021 جىلعى ەكى اۆتوكولىك – جالپى قۇنى 33 ملن تەڭگە شاماسىندا.
وسىلايشا، 2022 جىلعى ەسەپ بويىنشا، ءبايديلدينوۆتىڭ جەكە اكتيۆتەرىنىڭ جالپى قۇنى 250 ميلليون تەڭگەدەن اسقان.
بۇعان قوسا، ول 2024 جىلى ىستامبۇلدان ءۇش بولمەلى پاتەر ساتىپ الىپ، ونى ءوزىنىڭ YouTube ارناسىندا ماقتانىشپەن كورسەتكەن.
ءبايدىلدينوۆتىڭ داۋلى مالىمدەمەلەرى
گاز باعاسى
ەسكە سالساق، 2022 جىلى قاندى قاڭتار وقيعاسى قارساڭىندا ساراپشى ولجاس ءبايدىلدينوۆ سۇيىتىلعان گاز باعاسىنىڭ قىمباتتاۋىنا بايلانىستى ەل اراسىندا پىكىرتالاس تۋدىرعان ەدى. ول كەزدە ءبايدىلدينوۆ “گاز باعاسىنىڭ 15–20 تەڭگەگە ءوسۋى ايتارلىقتاي شىعىن ەمەس، ءبىز ينتەرنەتكە دە ودان كوپ تولەيمىز” دەپ مالىمدەپ، حالىقتى “قوعامدىق كولىككە كوشۋگە” شاقىرعان.
بۇل پىكىر كوپشىلىكتىڭ نارازىلىعىن تۋعىزدى. الەۋمەتتىك جەلى قولدانۋشىلارى قاڭتار وقيعاسى كەزىندە تاراعان قارۋلى ادامداردىڭ جۇك كولىگىندە جۇرگەن كادرلارىمەن وسى سوزدەردى بايلانىستىرىپ، قايتا ەسكە الدى.
جولاقىنى 500 تەڭگەگە كوتەرۋ ۇسىنىسى
ال جاقىندا ءبايدىلدينوۆ تاسىمالداۋشىلار شىعىنمەن جۇمىس ىستەپ جاتقانىن ايتىپ، اۆتوبۋس بيلەتى كەم دەگەندە 500 تەڭگە بولۋى ءتيىس دەگەن پىكىر بىلدىرگەن ەدى.
ونىڭ ايتۋىنشا، پەتروپاۆلدا تاسىمالداۋشىلارعا سۋبسيديا ءۇش جىلدان بەرى تولەنبەي كەلەدى، ال جولاقىنىڭ ءوزىن-وزى اقتايتىن قۇنى كەمىندە 345 تەڭگە بولۋى ءتيىس.
"مەن بۇل ماسەلەنى بۇرىننان ايتىپ كەلەمىن. اۆتوپاركتەرگە بولىنەتىن سۋبسيديالار جۇيەسى تۇماندى، جەمقورلىققا بەيىم، ءارى ساپا تۇرعىسىنان ەشقانداي ناتيجە بەرمەيدى"، — دەيدى ساراپشى.
ونىڭ پىكىرىنشە، استانا مەن الماتىدا قوعامدىق كولىك جولاقىسى 500 تەڭگە شاماسىندا بولۋى ءتيىس. بۇعان دەيىن ءماسليحات سەسسيالارىندا 450 تەڭگە كولەمىندەگى وزىندىك قۇن دا اتالعان.
"مىسالى، بىلتىر الماتىدا اۆتوبۋس تاسىمالىنا 200 ميلليون دوللار سۋبسيديا ءبولىندى. ءبىراق ودان ساپا جاقساردى ما؟" – دەيدى ول.
ساراپشى بۇل سالاعا نارىقتىق باعا مەن اشىق باسەكەلەستىك ەنگىزۋ قاجەت ەكەنىن ايتادى.
"ءۇش ايالداما جۇرگەن ادام مەن ءبىر جارىم ساعات جول جۇرگەن جولاۋشىنىڭ بىردەي تولەۋى ەكونوميكالىق تۇرعىدان قيسىنسىز. جولاقى قاشىقتىققا قاراي ەسەپتەلۋى كەرەك"، - دەپ قوستى ءبايدىلدينوۆ.
ءتىل ماسەلەسى
كەيىن ءبايدىلدينوۆ قازاقستانداعى تىلدىك جاعداي مەن ايماق ەلدەرىندەگى جاستاردىڭ ورىس ءتىلىن بىلمەۋ ماسەلەسىنە توقتالعان ەدى. ونىڭ ايتۋىنشا، بۇل قۇبىلىس رەسەي ءۇشىن دە ماڭىزدى الەۋمەتتىك ءارى يدەولوگيالىق فاكتورعا اينالىپ كەلەدى.
"ءقازىر قازاق تىلىندە وقىتىلاتىن سىنىپتار – 70 پايىز، ال ورىس تىلىندە وقىتىلاتىن سىنىپتار – شامامەن 30 پايىز عانا. ياعني، وقىتۋ جۇيەسىندە قازاق ءتىلىنىڭ باسىمدىعى ايقىن. بۇرىنعىداي رەسەي ءوز مەكتەپتەرىن اشۋ كەرەك پە دەگەن سۇراق تۋىندايدى، ءبىراق بۇل قادام ەل ىشىندە قارسىلىق تۋدىرۋى مۇمكىن"، – دەدى ءبايدىلدينوۆ.
سونىمەن قاتار ول ورتالىق ازيا ەلدەرىندەگى جاستاردىڭ كوپشىلىگى ورىس ءتىلىن بىلمەيتىنىن، بۇل جاعداي رەسەيگە ميگراسيالىق تۇرعىدان دا اسەر ەتىپ جاتقانىن ايتتى.
"قازاقستاننىڭ وڭتۇستىگىنەن ءارى قارايعى ەلدەردە جاستار ورىسشا سويلەمەيدى. بۇل رەسەي ءۇشىن دە ماسەلە – ميگرانتتاردىڭ ساپاسى تومەندەپ بارادى. مۇنىڭ اسەرىن ءبىز الداعى جىلدارى انىق بايقايمىز"، – دەيدى ساراپشى.
ءبايدىلدينوۆ جەكە تاجىريبەسىن مىسالعا كەلتىردى.
"بىلتىر قىتايعا ۇشتىم، "الماتى–ءۇرىمجى" رەيسىمەن. سول رەيستە قىتايعا باعىت العان ءتۇرلى ەلدىڭ ازاماتتارى بولدى. شەكارادا كورگەنىم – جاستار ورىسشا دا، قىتايشا دا سويلەي المايدى. ولار ونلاين-اۋدارماشى ارقىلى ءتۇسىنىسىپ تۇر. ال جۇڭگو شەكاراشىلارى كەرىسىنشە، ەركىن ورىسشا سويلەيدى. مۇندايدى كورىپ تاڭعالاسىڭ"، – دەدى ول.
ساراپشىنىڭ بۇل سوزىنە ءانشى ديماش قۇدايبەرگەن وتكىر جاۋاپ بەردى.
"ءبىز، قازاقتار، الەمنىڭ بارلىق ءتىلىن قۇرمەتتەيمىز. ءبىراق قۇرمەت وزىڭنەن باستالادى. ءوز تىلىنەن وزگەنىڭ ماقۇلداۋى ءۇشىن ۇيالعان ادام ءسوزىن ەمەس، تامىرىن جوعالتادى. ولجاس، سەن سياقتى ارانداتۋشىنى جۇمىستان شىعارادى دەپ ۇمىتتەنەمىن، ويتكەنى سەن قورقاق كىشكەنتاي بالا سەكىلدىسىڭ. قازاقشا جازبادىم، ويتكەنى سەن قازاق ءتىلىن بىلمەيسىڭ"، - دەيدى ديماش.
