Daryn FIRST Qualifier 2026 روبوتتار فەستيۆالى ءوز مارەسىنە جەتتى. ءىس-شاراعا الماتى قالاسى، الماتى جانە جەتىسۋ وبلىستارىنان، سونداي-اق مامانداندىرىلعان ءبىلىم بەرۋ ۇيىمدارىنان 200-گە جۋىق كوماندا مەن 1500-دەن استام وقۋشى قاتىستى، دەپ حابارلايدى Dalanews.kz.
ەكى كۇن بويى 4-18 جاس ارالىعىنداعى قاتىسۋشىلار ينجەنەريا، باعدارلامالاۋ جانە روبوتوتەحنيكا باعىتتارى بويىنشا ءوز بىلىمدەرى مەن پراكتيكالىق داعدىلارىن كورسەتتى.
فەستيۆال FIRST حالىقارالىق باعدارلاماسىنىڭ ءتورت ساناتى بويىنشا ۇيىمداستىرىلدى: FIRST LEGO League Discover، FIRST LEGO League Explore، FIRST LEGO League Challenge جانە FIRST Tech Challenge.
2025-2026 وقۋ ماۋسىمىنىڭ تاقىرىبى — ارحەولوگيا. ماۋسىم اياسىندا قاتىسۋشىلار ادامزات تاريحىن زەردەلەۋ، مادەني مۇرانى ساقتاۋ جانە وتكەننىڭ قۇپيالارىن زاماناۋي تەحنولوگيالار ارقىلى زەرتتەۋگە باعىتتالعان جوبالار ازىرلەدى. كوماندالار ارحەولوگيالىق زەرتتەۋلەرگە قاتىستى وزەكتى ماسەلەلەردى تالداپ، روبوتتار كومەگىمەن ينجەنەرلىك تاپسىرمالاردى ورىندادى، سونداي-اق تاريحي دەرەكتەردى سيفرلاندىرۋ مەن ساقتاۋ بويىنشا يننوۆاسيالىق شەشىمدەر ۇسىندى.
فەستيۆال قورىتىندىسى بويىنشا 29 ۇزدىك كوماندا حالىقارالىق دەڭگەيدەگى كەلەسى كەزەڭدەرگە — Kazakhstan Central Asia FIRST Championship 2026 جارىسىنا جولداما الدى. اتالعان چەمپيونات 2026 جىلعى اقپان ايىندا استانا قالاسىندا وتەدى.
