Sot otyrysynda kýáger Ádilhan Mýsin Biz Birgemiz Qazaqstan 2030 qory jinaǵan qaiyrymdylyq qarjysy qalai qolma-qol aqshaǵa ainaldyrylǵanyn egjei-tegjeili baiandady, dep habarlaidy Dalanews.kz.
Mýsinniń aitýynsha, ol Perizatty 2014 jyldan beri áieli arqyly tanidy. 2024 jyldyń aqpan-naýryz ailarynda olar qaiyrymdylyq týraly, sonyń ishinde Gazadaǵy jaǵdaiǵa kómektesý jaiyn da talqylaǵan. Alaida keiin qor qyzmeti Qazaqstandaǵy tasqynnan zardap shekkenderge baǵyttalǵan.
2024 jyldyń kókteminde Perizat Qairat odan Qytai shekarasynan kiiz úi men ózge de taýarlardy satyp alý úshin kómek suraǵan. Onyń aitýynsha, jetkizýshiler tek qolma-qol aqshamen jumys isteýge kelisim bergen, esepshot arqyly aýdarym qabyldamaǵan.
Mýsin Perizatty kásipkerlermen tanystyryp, aqsha olardyń atyndaǵy jeke kásipkerlik shottaryna aýdarylǵan. Keiin bul qarajatty qolma-qol alyp, Mýsinge tapsyrǵan. Ol óz kezeginde aqshany Perizat Qairatqa jetkizip otyrǵan.
"Perizattyń jetkizýshileri boldy, olar naqty aqshany talap etti. Biz sendik. Qujattardy keiinirek rásimdedik", – dedi kýáger.
Onyń aitýynsha, bir transhtyń kólemi shamamen 200 million teńgeni quraǵan. Syzbaǵa 12–13 jeke kásipkerlik qatysqan, árqaisysy 70 million teńge shamasynda aqsha alǵan.
Is bastalǵan kezde Kaspi Bank eki jeke kásipkerdiń esepshotyn buǵattap tastaǵandyqtan, qarajatty sheshý múmkin bolmaǵan. Biraq keiin Perizat Qairattyń ózi bankpen kelissóz júrgizip, shottardy qaita ashqyzǵan.
Mýsin Perizattyń Qytaiǵa barǵanyn naqty rastai almaǵanymen, onyń satyp alynǵan kiiz úiler men bioájethanalarǵa qatysty sýretterin kórgen. Sondai-aq Qairat kedende esh qiyndyq bolmaitynyna sendirgen.
Mýsin mámileler zań aiasynda júrýi kerek bolǵanyn, alaida ýaqyt tyǵyz bolǵandyqtan formaldyqtarǵa mán berilmegenin alǵa tartty.
Aita keteiik, Astanada Perizat Qairat pen onyń anasy Ǵaini Alashbaevaǵa qatysty sot protsesi jalǵasyp jatyr. Qazir sýdialar sý tasqyny kezinde jinalǵan qarajatqa qatysty epizodty qaraýda.
Buǵan deiin sot otyrysynda Qairatqa 200 mln teńge aýdarǵan kompaniianyń ókili Galia Isaeva sóz sóilegen edi. Onyń aitýynsha, sol kezeńde kompaniiany Perizat Qairattyń áleýmettik jelidegi belsendi jarnamasy sendirgen.
"Prezidenttiń sý tasqyny kezinde jasaǵan úndeýinen keiin basshylyq zardap shekkenderge kómek kórsetý týraly sheshim qabyldady. Bizge Biz Birgemiz qory senimdi uiym bolyp kórindi. 10 mamyr kúni aktsionerlik qoǵamnyń shotynan qorǵa 200 mln teńge aýdardyq. Perizat Qairattyń atynan jariialanǵan jarnamada nesie tólemderin toqtatý týraly úndeý de boldy. Bul da áser etti – shyn máninde, halyqqa jany ashityn adam siiaqty kórindi", – dedi Isaeva.
Sonymen qatar Jusan Bank Perizat Qairattyń qoryn teksermesten 300 mln teńge aýdarǵany týraly málimdegen edi.
Perizat Qairatqa qatysty úsh epizodtyń birinde ol sý tasqynynan zardap shekkenderge kómek kórsetý úshin shamamen 2,9 mlrd teńge jinap, onyń tek 920 mln teńgesin ǵana maqsatty túrde jumsady dep aiyp taǵyldy.
Osy naýqan aiasynda First Heartland Jusan Bank (qazirgi ataýy Alatau City Bank) 300 mln teńge kóleminde qaiyrymdylyq kómek kórsetken. Banktiń ókili Beibit Jorabaevtyń aitýynsha, olarǵa BizBirgemiz Qazaqstan 2030 qorynan Perizat Qairattyń qoly qoiylǵan hat kelgen. Onda qaiyrymdylyq kómek suralǵan. Bul másele banktiń basqarma otyrysynda qaralyp, qarajat qaiyrymdylyq retinde aýdarylǵan.
Alaida Perizat Qairat bul bastamanyń banktiń ózinen shyqqanyn aitady. Osyǵan bailanysty ol sottan PR qyzmetiniń ókili Mihail Egormen bettesýge múmkindik berýdi surady. Aitýynsha, dál sol adammen kelissóz júrgizgen.
Bank bul iske jábirlenýshi tarap retinde tanylǵan. Onyń atynan sotta Jorabaev kýálik berdi.
Qorǵaýshy Aslanbek Davletiarov sot otyrysynda bankten: nelikten dál sol 300 mln teńge urlandy dep senimdi aitasyzdar, bálkim ol qarajat shyn máninde zardap shekkenderge jumsalǵan shyǵar? – dep surady. Onyń sózinshe, Qairat 2024 jyldyń 2 sáýiri men 18 shildesi aralyǵynda 1 mlrd teńgeden astam qarjyny motorly jáne úrmeli qaiyqtarǵa, generatorlarǵa, kiiz úilerge, azyq-túlik pen tehnikalarǵa jumsaǵan.
"Biz tergeý materialdarymen tanystyq, tergeý zań aiasynda júrgizilgenine kóz jetkizdik. Tergeýshi usynǵan barlyq qujattardy oqydyq. Biraq naqty bizdiń qarajat qaida jumsalǵanyn zerttegen joqpyn, sondyqtan bul suraqqa naqty jaýap bere almaimyn", – dedi Jorabaev.
